Mundua

Gutxienez 16 pertsona hil , horietako hiru agenteak eta gainerakoak zibilak, eta 20 inguru zauritu dituzte Peshawarren (Pakistan) izandako eraso suizida batean, polizia iturriek jakitera eman dutenez.

Erasoa bertako 10:30ean gertatu da segurtasun neurri handiak dituen Khyber errepidean, Ipar-ekialdeko Mugako Probintziako (NWFP) hiriburuan, etorbide nagusi batean.

Aipatu iturriaren arabera, erasotzaile suizida batek soinean zuen lehergailua zartarazi du Auzitegi Gorenaren atarian, guardiek miatu aurretik.

Atentatua gertatu den lekutik gertu NWFPren Asanblea ere badago eta Armadaren zenbait egoitza.

7 atentatu bi astetan

Gaurkoarekin, zazpi dira bi astetan Peshawarren (3 milioi biztanle ditu) izan diren atentatuak.

Pakistanen atentatu oldea jasaten ari dira urriaren hasieratik eta gutxienez 471 pertsona hil dituzte, gehienak zibilak. 30 atentatu inguru izan dira merkatuetan, segurtasun indarren egoitzetan edo agintari politikoen eta militarren bulegoetan.

Pakistango Armada talibanen kontra erasoa egiten ari da Hego Waziristanen, talibanen babesgunetzat jotzen den eskualdean, eta ipar-ekialdeko puntu batzuetan.