Mundua

Europar Batasuneko buruzagiek akordioa lortu dute. Horrela, EBko kargu berriak nortzuk beteko dituzten erabaki eta Europa Batuaren aurpegiak izango direnak hautatu dituzte. Herman Van Rompuy belgikarra Europako Kontseiluko presidentea izango da.

Catherine Ashton britaniarra Atzerri Politikarako eta Segurtasunerako goi ordezkaria izango da, Javier Solana ordezkatuz, iturri diplomatikoek jakinarazi dutenez.

Frantziak eta Alemaniak proposatu dute Van Rompuy demokristauaren hautagaitza; Rompuy izan da gainerako Europako kideen artean gaitzespen gutxien sortu dituena. Britainia Handiak Tony Blair ministro ohia postuan jartzeari uko egin eta gero lortu du Rompuyk bere kargua.

Horren truke, Londresek Catherine Ashton karguan jartzea lortu du. Europako sozialistek Ashtonen izena proposatu zuten goi-bilera hasi baino lehen. Beraz, Miguel Angel Moratinos Espainiako Atzerri ministroaren hautagaitza bertan behera geratu zen.

Lisboako Ituna

Lisboako Itunak Europako Kontseiluko presidente egonkorraren eta Atzerri Politikarako eta Segurtasunerako goi ordezkariaren karguak sortu ditu. Gaur izendatu berri dituzten karguak Europako irudia izango dira; izan ere, biek izango dituzte eskuduntzak kanpo arazoetan.

Hala ere, Lisboako Itunak ez ditu Europako Kontseiluko presidente egonkorraren zereginak zehatz mehatz azaltzen. Beraz, karguaren profila lehen presidenteak ematen dion edukiaren araberakoa izango da. Van Rompuy politiko zuhurra hautatzean, protagonismo gehiegi hartzen ez duen presidentea izatea nahiago dutela argi utzi dute Europako buruzagiek.

Bi urte eta erdiko agintaldia izango du Europako Kontseiluko presidenteak; eta kargua behin berritzeko aukera izango du. Europako goi-bileretako lanen "buru eta bultzatzaile" izango da, eta horiek prestatzeaz arduratuko da. "Adostasuna eta batasuna" lortzen saiatuko da eta bilera bakoitzaren ostean txosten bat aurkeztuko dio Europako Parlamentuari.

Bestalde, Atzerri Politikarako eta Segurtasunerako goi ordezkariak orain arte seihileko Kontseiluko Presidentetzak izandako ardurak hartuko ditu, eta gainera, Kanpo Arazoetarako Europako Batzordearen presidenteordea izango da.

Batzordeko presidenteorde bezala, kanpo harremanen arduraduna izango da eta sail horretako politikak koordinatu beharko ditu.

Ashtonek bost urteko agintaldia izango du eta 50.000 milioi euroko diru-laguntza izango duen Kanpo Harremanetarako Europako Zerbitzuaren laguntza izango du ere.

Gainera, estatutu juridiko berezia izango du, aurrekontuen eta langileen kudeaketa autonomoarekin. Aurreko Atzerri Politikarako eta Segurtasunerako goi ordezkaria 1999an izendatu zuten, eta ordutik, Javier Solana espainiarra izan da karguan.

Lehen adierazpenak

Negoziaketa guztietan Estatu guztien interesak entzuteko eta errespetatzeko konpromisoa hartu du Van Rompuyk. "Zuhurra" izaten jarraituko duela esan du agintariak eta akordioa lortzeko lan egingo duela berretsi du, aurkakoak errespetatuz.

"Guztien sentsibilitateak eta interesak errespetatuko ditut. Nahiz eta batasuna gure indarra izan, aniztasuna gure aberastasuna da. Estatu bakoitzak historia eta kultura propioak ditu, eta baita gauzak egiteko era bat ere. Helburu berdina dugu, baina bakoitzak maleta ezberdinak eramango ditu. Hori ukatzea kaltegarria izango litzateke. Aniztasuna errespetatu gabe ez gara batasunerantz joango", esan du EBko presidente berriak, aho batez aukeratu ostean emandako prentsaurrekoan.