Albisteak

Lawrence Lessig, Creative Commonseko sortzailea eta copyleft ereduaren defendatzailea, Arabako Teknologi Parkean izan da gaur, jabetza intelektuala eta teknologia berrien inguruko hitzaldia emateko. Lessig abokatua eta Harvardeko, Chicagoko eta Stanfordeko Zuzenbide irakaslea da. Creative Commons elkartearen bidez lizentzia askeak babesten ditu, horiei esker egilea bera baita bere obraren jabe bakarra eta besteei dohainik erabiltzeko aukera ematen baitie.

Hitzaldiak Lessigen azken liburuaren izenburu bera izan du: “REMIX: Artea eta merkataritza oparoak ekonomia hibridoan eraiki”. Araba Enpresa Digitalak antolatuta, hitzaldian Lessigek egile eskubideen gehiegizko arautzearen kontrako ikuspuntua azaldu du, ez baitu uste merkataritza eta ekonomiaren garapenerako onuragarria denik. Bere teoriaren arabera, “sortzaile askok ez dute nahi euren obraren kontrola hain mugatua egotea eta nahiago dute erabil dezakeen edozeinek obra horrekin gauza berriak egitea, kopiatzea, partekatzea, proiektuak egitea”.

AEBtako adituak Cultura libre (Kultura askea) liburua idatzi du. Bertan copyleft ereduaren alde agertzen da, internetetik garapen kultural eta zientifikoa lortzeko modurik egokiena dela uste baitu.