Albisteak

Jose Luis Rodríguez Zapatero Espainiako gobernuko presidenteak adierazi duenez, Garoñako zentral nuklearra 2013an ixtea erabaki erabat autonomoa izan da eta aurreratu duenaren arabera, legea aldatuko du zentral nuklearren bizia zehazteko.

Zapaterok esan du datorren udazkenean energia plana eramango duela Parlamentura. 2030 arte izango diren energia beharra jasoko ditu planak, zein energia mota erabiliko den, zenbat instalazio energia berriztagarrientzat, zenbateko kapazitatea izango duten, zenbat zentral nuklear izango diren eta beste hainbat arlo jasoko ditu plangintzak.

Zapaterok esan du zentralak kudeatzen dituzten enpresei ohar argia bidali diela, hau da, etorkizuna energia berriztagarrietan dagoela.

Horrez gain, gobernuak legea aldatuko du zentral nuklearren bizia zehazteko. Bizitza baliagarria eta diseinu-bizitzaren moduko definizioak zehaztuko ditu legeak. Garoñako zentralari dagokionez, legea aldatu egin beharko dela adierazi du, luzapenak erabakitzean, ingurumen-eraginaren balorazioa egin beharra jasotzeko.