Albisteak

Bermeoko itsasontzi batek, Alakranak, piraten ontzi baten erasoa saihestea lortu zuen Somaliako kostaldetik 495 miliara. Itsasontzi bizkaitarreko patroiak jakinarazi duenez, eguraldi txarra eta sareak batuta eduki izana gakoak izan ziren ihes egitea lortzeko.

Gertaera atzo izan zen eguerdiko 13:00ak aldera, ontzia 0450 Iparraldera eta 5453 Ekialdera koordenadetan zegoela.

Itsasontzi erasotzailearen tamaina txikia dela eta, (hamar bat metroko luzera zeukan) radarren sistemak ontzia antzematea zaildu zuen Alakranatik zazpi milara hurbildu zen arte.

Atzetik zihoan ontziak eraso egin nahi zionentz frogatzeko, Bermeoko itsasontziak hainbat mugimendu egin zituen eta behin baino gehiagotan norabidea ere aldatu egin zuen, baina ontziak atzetik jarraitzen ziola ohartu zirenean, abiadura handitu eta erasotzaileak "atzean uztea" erabaki zuten.

"Euren zazpi korapiloko abiaduran zebiltzaten eta gu berriz, 19 korapilotik gora, baina hala ere, eguraldi txarra zegoelako lortu genuen alde egitea, bestela harrapatu egingo gintuzketen". Gainera, tripulazioak zertxobait lehenago bildu zituen sareak, eta hori ere gakoa izan zen, izan ere, hala ez izatekotan, "sarea uretan egon izan balitz, ezinezkoa izango litzateke ontzia mugitzea, ehun kilotik gorako pisua dauka eta".

Espainiako ontziek "eskertu" egiten dute "Canarias" fragata espainiarra inguruan egotea, baina euren ustez, abioiak ingurua miatzen egon beharko luke segurtasuna bermatzeko.

Eusko Jaurlaritzak uste du atuna arrantzatzen duten ontzien segurtasuna bermatzeko eta piraten mehatxua saihesteko modu egokiena "segurtasun baldintza handiagoak eskaintzen dituen arrantza-tokiak bilatzea" izango litzatekeela.

Hala adierazi dio Pilar Unzalu Jaurlaritzako Ingurugiro, Nekazaritza eta Arrantza sailburuak Atunaren Arrantzarako Ontzien Elkarte Nazionalari, Bermeon.

Bileran, Unzaluk elkartasuna adierazi dio sektoreari eta haien "kezka" helarazi die itsas-lapurrak dauden inguruetan arrantzatzen duten itsasontzien segurtasuna dela eta.