Albisteak

Enpresa Publiko Handien mailan lehiatzen da EITB. Euskal komunikazio taldearekin batera, punta-puntako beste 13 erakunde eta enpresa europar daude finalisten artean, denetarikoak, arlo publikokoak zein pribatukoak. Besteak beste, Poloniako Volskwagen, Frantziako Robert Bosch, Liverpool-eko (Erresuma Batua) John Moore Unibertsitatea eta Austriako NXP Sound Solutions elektronika enpresa daude. EFQMko sari banaketa ekitaldia astelehen honetan, irailaren 28an, izango da Bruselako Plaza Hotelean izango den afari batean. Kalitatearen Kudeaketarako Europako Fundazioak (European Foundation for Quality Management) urtero egiten duen bilerari amaiera emango dion ekintza izango da, hain zuzen ere, sari banaketa.

EITBk kalitatearen aldeko apustu indartsua egin du eta Europan jasotako onespenak ia duela 10 urte hartutako konpromisoa sendotzen du. 2004an Zilarrezko Q eta 2007an Urrezko Q jaso zituen EITBk, Eusko Jaurlaritzaren eskutik. Horrez gain, Fundibeq-ek ematen duen Kalitatearen Sari Iberoamerikarra eskuratu zuen 2006an.

EFQMk Europako erakundeen lehiakortasuna hobetzea du helburu. Edozein esparru eta edozein neurritako erakundetan egiten du lan. Enpresa jardun onenak identifikatuz eta bultzatuz hobekuntza lortu nahi du. Enpresa Bikaintasunaren Sariak urtero deitu dituzte 1992tik hona eta 5 maila dituzte: Enpresa Handiak, Enpresa Txiki eta Ertain (ETE) Independenteak, ETE Filialak, Sektore Publikoko Erakundeak eta Unitate Operatiboak.

EITBko ebaluazio prozesua

Otsailean, EITBk bere kudeaketa eredua azaldu eta 2008ko emaitzak biltzen zituen memoria aurkeztu zion EFQM Fundazioari. Ondoren, EITBko zuzendaritzako kide batzuk ebaluatzaileekin elkarrizketatu ziren Bruselan. Ebaluatzaile taldea kanpoko sei profesionalek osatu zuten, Siemens, Rita Green Consulting, VP Bank, Lufthansa, T-Sistems eta Philips enpresetako sei zuzendarik, hain zuzen. Bilera horren helburua EITBrekin lehenengo harremana izatea eta, bidez batez, kudeaketa sistema azaldu eta memoria azaltzeko beharrezkoak ziren agiri eta dokumentazioa aurkeztea izan zen.

Hurrengo fasean, maiatzaren 25etik 29ra, ebaluatzaile taldea EITBn izan zen arlo guztiak (telebista, irratia eta Internet) bertatik bertara ezagutzen, eta baita lortutako emaitzak ere. Horretarako, taldea 3 batzordetan antolatu zuten. Batzorde bakoitzean 2 ebaluatzailek hartu zuten parte eta 170 langilerekin izan zituzten elkarrizketak, 50 bileratik gora guztira. EFQM Europaren ebaluazio prozesua oso trinkoa da eta ebaluatzaileei ere ahalegin handia eskatzen die. 100 ordutik gorako lana da ebaluatzaile bakoitzarentzat. Memoria ikasi, dokumentazioa aztertu, bisita prestatu, egin eta ebaluazio txostena lantzen ematen dute denbora hori guztia.

European Foundation for Quality Managemet

EFQM (European Foundation for Quality Management) 1988an sortu zuten Europako 14 konpainia handienen presidenteek, Batzorde Europarraren laguntzarekin. Gaur egun, fundazioak 600 erakunde kidetik gora ditu; multinazionalak, estatu mailako konpainia garrantzitsuak, unibertsitateak eta ikerketarako institutuak, besteak beste. Europako erakunde eta enpresak eraginkor eta lehiakorragoak izateko lan egiten du fundazioak, ekimen guztietan kalitatea sendotzeko eta kalitatearen garapena hobetzen eta sustatzen laguntzeko.