Albisteak

Inauterietarako eguraldiak hotz handia utziko du, baina giroa, orokorrean, lehorra izango da, Euskalmet Euskal Meteorologia Agentziak eskainitako joeraren arabera. Iragarpena erabat baieztatu aurretik, badirudi Ostegun Gizenak asteazkenak hasiko duen ildotik jarraituko duela, eta tenperatura oso hotzak eta izozteak izango ditugula. Dena dela, bustitzekotan, prezipitazioak txikiak izango lirateke.

Ostegun Gizenean, hortaz, euri apur bat egin lezake, eta malutaren bat 100-200 metrotik gora bota lezake, baina nabarmenena hotza eta izotza izango dira; izan ere, azken hori lurralde osora hedatzeko aukera dago. Maximoak 6-7º-tik behera egongo dira itsasaldean, eta barnealdean 5 gradutik behera kokatuko dira. Minimoak 0º-tik beherakoak izango dira puntu askotan.

Ostiral Mehean, otsailaren 12an, termometroek beherago ere egingo dute, baina joerak, oraingoz, giro lehorra iragarri du. Astebururako, eguraldiak ez du aldaketa handirik ekarriko: tenperaturak oso hotzak izango dira eta elur-kota oso behean egongo da, baina ez dago prezipitaziorik iragarrita.