Albisteak

Zapateroren Gobernuak iragarritako Lan Merkatuaren erreformari kritika gogorrak bota dizkio gaur ELA sindikatuak. Adolfo Muñoz idazkari nagusiaren esanetan, PSOEren Gobernuak "patronala indartu" nahi du, sindikatuei boterea kenduz. "Eskuma erreakzionarioaren" papera egiten duela esan dio Zapaterori.

Sindikatuko buruaren ustez "erdipurdiko sozialistak" dira erreforma honen atzean daudenak. Horrez gain, ELAren ustez, harrigarria da "CC.OO. eta UGT sindikatuak joko honetan aritzeko prest egotea".

Adolfo Muñozen hitzetan, elkarrizketa soziala "argazki bat besterik ez da izan", bai Espainian, zein Euskal Herrian ere.

Horrez gain, lan merkatuaren erreforma honek "kaleratzea erraztu eta merkatzea ekarriko du". ELAk zalantzan jarri du neurri berriek lanpostuak sortzeko balioko dutenik.