Albisteak

EITBk ‘Telebista publikoa eta demokrazia’ udako ikastaroa antolatu du aurten, nazioarteko krisi orokorraren testuinguruan telebistak arlo publikoan duen zentzuaz eta finantziazio ereduaz gogoeta egiteko. Ikastaroa Alex Aranzabal EITBko garapen zuzendariak gidatuko du, eta Alberto Surio EITBko zuzendari nagusiak aurkeztuko du.

'Telebista publikoa eta demokrazia' Donostiako Miramar jauregian burutuko da uztailaren 23 eta 24an, eta telebista munduko pisuzko parte hartzaileak egongo dira, besteak beste: Wilf White BBCko Estrategia eta Komunikazioa zuzendaria, telebista britainiarraz eta zerbitzu publiko ereduak duen esperientzia luzeaz arituko da; Ramon Jauregui Presidentziako ministro ohi eta Kongresuko diputatuak Espainiako telebistaren erregulazioa jorratuko du, ikuspuntu desberdinak eta historia kontuan izanda; Ricardo Vaca Barloventoko zuzendariak Espainiako telebista publikoaren atzera begirakoa egingo du, iragana aztertu, orainaldia hausnartu eta etorkizunerako proiekzioa eginez; Manuel Palacio, Carlos III unibertsitateko Giza Baliabide, Komunikazio eta Dokumentazio dekanoa, telebista publiko eta pribatuen arteko elkarbizitzaz arituko da; eta Alex Aranzabal Minguez EITBko Garapen zuzendari eta ikastaroko zuzendariak demokrazia eta komunikabide publikoen finantziazioak aztertuko ditu. Ikastaroaren bigarren eguneko irekiera, Jesus Lopez Cabeza CARTVko zuzendari eta FORTAko presidenteak egingo du.

Ikastaroan parte hartuko duten gonbidatuek telebista publikoaren inguruko hausnarketa egingo dute. Halaber, finantziazioaz eta krisi garaian zalantzan jarri den gastu publikoaz arituko dira, gobernuek eta administrazio publikoek aurrekontuak murriztu dituzten honetan.

Sorreratik, telebista publikoek zerbitzu publikoko jarduera garatu dute, Estatuan eta esparru autonomikoan, informazioa, heziketa, entretenimendua, hizkuntza gutxituak eta, oro har, europar gizartearen balore demokratikoak sendotuz. Aldi berean, digitalizazioak eta audientziak eta publizitate merkatua zatitzeak telebista publikoaren pisua arindu dute.

Doitze eta euste politikak Europako kontinentera zabaldu diren honetan, ‘Telebista publikoa eta demokrazia’ EITBk antolaturiko udako ikastaroak telebista publikoen funtzioaz eta izaera demokratikoaz hausnartzen lagunduko du.