Albisteak

Patxi Lopez PSE-EEk Eusko Legebiltzarrerako hauteskundeetan izan duen hautagaiak ziurtatu du hautesleek erakutsi dutela “aldaketa” nahi dutela. Hori dela eta, aldaketa hori gauzatzeko “ahaleginak eta bi” egingo dituela aurreratu du.

Lopez kazetarien aurrean agertu da hauteskundeen emaitza jakin eta gero. Bere alderdiak 24 eserleku lortu ditu, hots, duela lau urte baino 6 gehiago, eta PPrekin eta UPyDrekin batera gehiengo osoa dauka.

Hori horrela, aldaketa gidatzeko “zilegitasuna” daukala adierazi du. "Argiago esango dut, ez diot uko egiten nire hautagaitza aurkezteari eta Eusko Jaurlaritzako hurrengo lehendakaria izateko behar beste babes biltzeari", gaineratu du.

Lopezek lehendakari ikusten du bere burua, eta are gehiago, lehendakari izango balitz bezala hitz egin du. Jarraitzaileak zoriondu egin ditu, "aurrekaririk gabeko arrakasta" lortu dutelako, eta eurek duela lau urte baino 40.000 boto gehiago eskuratu dituzten heinean, hirukoak “60.000 galdu” egin dituela gogorarazi du.