Jendea

George Clooney aktore eta zuzendari estatubatuarra Etxe Zurian izan da Sudan eta Hego Sudanen bizi duten krisi humanitarioa salatzeko. Herrialde horretan egin duen bira batetik itzuli da duela egun batzuk Clooney.

Aktoreak Txinako Gobernua konbentzitzeko eskatu dio Obamari, nazioartea Sudango Gobernuari egiten ari zaion presioa egiten lagun dezan, laguntza taldeak herrialdearen hegoaldean sartu ahal izateko. Gosete handia pairatzen dute gune horretan.

Aktorearen esanetan, presidente estatubatuarrak Hu Jintao Txinako presidentearekin izango duen hurrengo bileran gai horri buruz eztabaidatuko dutela esan dio.