Politika

PSE-EEren eta PPren batzorde negoziatzaileak batzartu egingo dira gaur berriro Patxi Lopez lehendakari izan dadin negoziatzen jarraitzeko.

Bi alderdien arteko lehen bilera ofiziala duela bost egun egin zuten, eta ondoren sozialistek ziurtzat eman zuten PPren babesa.

Popularrek, baina, "konpromiso politikoak" idatziz uzteko eskaera egin zuten handik eta gutxira, eta euren babesa doanekoa ez izatea helburu dutela erakutsi dute azken egunetan.

Antonio Basagoiti EAEko PPko presidenteak EITBn jarri du arreta batik bat, "Batasunekoa" dela egotzi baitio. Hori dela eta, Euskal Irrati Telebista goitik behera aldatzeko konpromisoa lortu nahi dio Patxi Lopezi, eta El Pais egunkariaren arabera, sozialistak prest daude aldaketa hori gauzatzeko.

Nolanahi ere, PSEk ahalik eta lasterren egin nahi du inbestidura saioa, eta gaur bertan lehen urratsa egingo du Eusko Legebiltzarra osatzeko. Izan ere, bere 25 legebiltzarkideek akreditazioa jasoko dute Gasteizko Ganbaran, eta horrela abian jarriko dituzte Legebiltzarra osatzeko epe legalak.