Politika

Juan Jose Ibarretxe jarduneko lehendakariak ez dio uko egiten inbestidura saioan bere hautagaitza aurkezteari eta karguan beste lau urte jarraitzeari, "80.000 arrazoi demokratiko" baititu. Hori da, hain zuzen, hauteskundeetan PSE-EEri atera dion boto kopurua.

Catalunya Radio irrati-katean egindako elkarrizketa batean, Ibarretxek gogorarazi du bera izan dela "bozkatuena" hauteskundeetan eta "gaur egun" ez dagoela bera bezala "30 boto" dituen hautagairik.

Lehendakariak nabarmendu du euskal gizarteak "abertzale" izaten segitzen duela, lehendakaria Patxi Lopez izan edo ez izan. Hori dela eta, "gobernu indartsu eta egonkorra" egitearen alde egin du.

Gainera, Patxi Lopezek Gobernu "askotarikoa, egonkorra eta ezberdinen arteko akordioen aldekoa" promestu bazuen ere, haren Exekutiboa PPren botoekin osatuko duela nabarmendu du.

"Gobernua indartsua izan beharko litzateke", azpimarratu du, eta PSEren eta PPren 38 botoak EAJ Gobernutik kentzeko baino ez diren galdetu du. "38 boto daude suntsitzeko, baina 25 baino ez eraikitzeko?", galdetu du.

"Gobernu indartsua egin nahi badute, babesak behar dituzte. Sozialistek ezin dute pentsatu PPrekin egongo direla inbestiduran eta hurrengo egunean denen babesa izango dutela Ganberan", adierazi du.