Politika

Arnaldo Otegi Euskadi Irratiko Mezularia saioan izan da eta bere esanetan, Hego Euskal Herrian "okerreko hainbat zenbaketa" antzeman dituzte. Kasu esanguratsuena Amezketakoa (Gipuzkoa) da: Iniziatiba Internazionalistari ez diote boto bakar bat zenbatu eta POSI alderdiari, berriz, 113. Kontutan izan behar da orain bost urte 144 boto izan zituela Amezketan ezker abertzalearen zerrenda baliogabetuak.

Otegik jakinarazi duenez, baieztatuta dauzkaten "akatsen zuzenketarekin bakarrik", Iniziatiba hirugarren indarra bihurtuko litzateke Euskal Autonomia Erkidegoan.

Espainiako Estatuan izandako beste hainbat irregulartasun aipatu ditu Elena Martinez hautagaiak Madrile. Martinezek salatu duenez, "hainbat hauteskunde-kolegiotara Madrilgo Gobernu Ordezkaritzaren faxa iritsi zen, esanez Iniziatiba hauteskunde lehiatik kanpo geratu zela eta, beraz, bere boto paperak kendu behar zirela".

Martinezek jakinarazi du zenbaketa oker eta irregulartasun guztiak aztertzen ari direla "inpugnazioak prestatzeko". Otegiren esanetan, "gauza harrigarri asko gertatu dira" eta bere susmoa da, "guzti horien atzean Estatuaren eskua" dagoela.