Politika

Eusko Legebiltzarreko talde guztiek (PPk eta UpyDk izan ezik) Garoñako zentral nuklearra "behin betiko" ixteko eskatu dute gaur legegintzaldiko lehen Osoko Bilkuran adostutako ekimen baten bidez.

Popularrek eta UpyDk ez, beste talde guztiek babestu dute EAk, EBk eta sozialistek adostutako erdibideko testua. Bertan, lehenik eta behin Garoñako zentral nuklearra behin betiko ixtea eskatzen da.

PP eta UpyD ixtearen kontra bozkatu duten talde bakarrak izan dira. Carmelo Barriok (PP) esan duenez, zentral nuklearra martxan jarraitzen uztea da "zentzuzkoena".

Garoña ixtearekin batera, inguruko ekonomia suspertzeko plan baten beharra azpimarratu dute taldeek sinatutako ekimenean.

Kontzertu ekonomikoa blindatzea

Eusko Legebiltzarrak berriz eskatu dio Diputatuen Kongresuari beharrezko legezko erreformak egitea, zerga arauen aurkako helegiteak Auzitegi Konstituzionalean bakarrik aurkeztu ahal izateko.

Kontzertu Ekonomikoa "blindatzea" bezala ezagunagoa den neurri honek, ez luke utziko epaitegi arruntetan helegiteak aurkeztea.

Gasteizko Ganberak 2007ko ekainaren 27an onartu zuen aho batez Gorte Nagusiei Auzitegi Konstituzionalaren Legea eta Botere Judizialaren Legea erreformatzeko eskaera legea.

Ekimen hau datorren udazkenean eztabaidatuko dute Diputatuen Kongresuan 2008ko hauteskunde orokorrek eragin duten atzerapenaren ostean.

EAJk agintaldiaren hasieran beharrezkotzat jo zuen eskaera egitea eta maiatzean lege proposamen berdina egin zuen. Gaur, alderdi guztiek alde bozkatu dute UpyDk izan ezik.

Gaur Eusko Legebiltzarrak lehen bilkuran onartu duen testuaren arabera, Beheko Ganberan Kontzertu Ekonomikoa "blindatzea" defendatuko duten legebiltzarkideak hautatu behar dira.

Izendapen hori ezinbestekoa da izan ere, bere garaian eginbehar horiek betetzeko aukeratu zituzten legebiltzarkide biak (Isabel Celaa eta Jose Antonio Rubalkaba) dagoeneko ez daude Legebiltzarrean.

UpyD izan da ezezkoa eman duen alderdi bakarra

Gorka Maneiro UPyDko legebiltzarkideak esan du proposamenaren aurka agertu direla, euren ustez "propaganda politikoa baino ez" delako, izan ere, aurreikusita dago datorren azaroan Kongresuak eztabaida hori egitea, eta beraz, ez da beharrezkoa Lgebiltzarrak erantzuna izango duen eskaera bat berriz egitea.