Politika

ETAk Espainiako poliziaburu bat hil du Arrigorriagan, haren autoa leherrarazita, Rodolfo Ares Herrizaingo sailburuak baieztatu duenez. Biktima Espainiako Poliziaren Informazio Brigadako inspektorea da (Eduardo Antonio Puelles Garcia), 49 urte zituen eta Arrigorriagan bertan bizi zen, jaiotzez Barakaldokoa bazen ere. Espainiako Poliziaren brigada horrek ETAren kontrako borrokan dihardu.

Herrizaingo Sailak jakitera eman duenez, eztanda 09:05ean jazo da, Abusuko Santa Isabel kalean. Leherketak beste lau ibilgailutan ere egin ditu kalteak. Biktimaren emaztea eta haren bi seme-alabak Basurtuko Ospitalera eraman behar izan dituztela zabaldu dute albiste-agentziek, eztanda entzun eta antsietate krisi bat izan eta gero.

Agentzien arabera, bonbak bi kilo lehergai zituen eta agentearen ibilgailuaren erregai-tangaren alboan zegoen jarrita.

Hil-kapera

Espainiako Gobernuak Bilbon duen egoitzan jarri dute hil-kapera. Poliziaburuaren hilkutxa 16:45ean heldu da bertara.

Jose Luis Rodriguez Zapatero Espainiako Gobernuko presidenteak domina bat jarri dio ETAren azken biktimari.

Hil-kapera arratsaldeko seietan zabaldu dute eta, besteak beste, Patxi Lopez lehendakaria, Juan Jose Ibarretxe lehendakari ohia eta Mariano Rajoy PPko presidentea bertaratu dira. Hileta, bestalde, gaur arratsaldean egingo dute Bilbon, 13:00etan.

Leherketa, lekuko baten arabera

Antza, inspektoreak, lanera joateko, autoa martxan jarri eta ia berehala gertatu da eztanda. Leherketaren ondorioz inguruan aparkatuta zeuden beste lau auto ere kiskali dira.
Aparkalekuan zegoen lekuko batek leherketa nola izan den azaldu du: "Autoa martxan zegoen, ibilgailutik irteten saiatu da eta bat-batean leherketa jazo da. Une horretatik aurrera garrasiak baino ez ditugu entzun".

Poliziari laguntzen ahalegindu dela esan du, baina sugarren ondorioz autora hurbiltzea ezinezkoa izan zaiola zehaztu du. Larrialdietarako zerbitzuak bertaratu eta suhiltzaileek sua itzaltzea lortu dutenerako, polizia hilda zegoen. Gorpua erabat kiskalita geratu da eta horrek biktimaren identifikazioa zaildu du hasiera batean.

Ertzaintzak segurtasun-eremua ezarri du atentatuaren tokian, beste lehergailu bat egon zitekeelakoan.

&' || 'nbsp;Manifestazioa, mobilizazioak eta gaitzespenak

Bestalde, Patxi Lopez lehendakariak ETAren aurkako eta bakearen aldeko manifestazioa deitu du gaurko Bilbon (18:00) eta euskal gizarteari parte hartzeko deia luzatu dio. Horrez gain, elkarretaratzeak antolatu ditu euskal erakundeen aurrean gaur eguerdian.

Rodolfo Ares Herrizaingo sailburuak ere agerraldia egin du Legebiltzarreko pasiloetan ETAren atentatua gaitzesteko. Aresek "elkartasuna, babesa eta maitasuna" helarazi die Eduardo Puellesen familia, lankide eta lagunei.

Atentatu honen aurrean gaitzespena agertzeko eskatu dio euskal gizarteari, "modu baketsuan, baina irmotasun demokratikoarekin". Puellesen eginkizuna "gizarte osoaren eskubide eta askatasunak defendatzea" zela nabarmendu du.

Bestalde, Eusko Legebiltzarrak aho batez gaitzetsi du Espainiako poliziaren hilketa. Legebiltzarkideek minutu bateko isilunea egin dute bere omenez.

Arrigorriagako Udalean, berriz, ez-ohiko bilkura egin dute goizean eta Puellesen hilketa gaitzesteko adierazpena onartu dute aho batez. Ondoren, 12:00etan, elkarretaratzea egin dute udaletxe aurrean eta 20:00etan beste bat egin dute Abusun.

Eduardo Puellos ETAk 2009an hil duen lehen pertsona da. Alderdi politiko guztiek gaitzetsi dute atentatua, baita Jose Luis Rodriguez Zapatero Espainiako Gobernuko presidenteak eta Miguel Sanzek ere.

&' || 'nbsp;

&' || 'nbsp;