Politika

Gaur goizean Arrigorriagan ETAk Eduardo Puelles Garcia Espainiako Poliziako inspektorea erail du bonba-auto baten bidez.

Horren ostean, alderdi politikoek berehala gaitzetsi dute atentatua.

Iñigo Urkullu: "ETA pertsona bat hiltzen duenean, maila batean gizartea ere hiltzen du"

Iñigo Urkullu EAJko EBBko presidentearen esanetan, ETAk pertsona bat hiltzen duenean, Eduardo Antonio Puelles Garcia Espainiako poliziaren kasuan bezala, "maila batean" gizartea ere hiltzen du.

Erailketaren gaitzespenean indarrean jartzera deitu du, "balorazio politikoak alde batera utzita.
Urkulluren hitzetan, "zoritxarrez, ETA hor dago eta ez da bat-batean agertu dela".

EBBko presidenteak gaineratu duenez, "gaitzespen honetan beharrezkoa da denak oinarrizko giza eskubide baten bortxaketaren kontra azaltzea, pertsona orok bizitzeko duen eskubidearen urraketaren aurka, hain zuzen ere. Hori da gaur, EAJ moduan azpimarratu behar duguna, balorazio politikoak alde batera utzita".

Julio Astudillok (PSE) atentatua gaitzetsi du eta "terrorismoaren aurka batasuna eta sendotasuna" eskatu du.

Julio Astudillo Gipuzkoako Batzar Nagusietako PSE-EEko bozeramaileak atentatua gaitzetsi du eta "demokratei eskatu die demokraziarekin duten konpromezua indartu dezaten", beti ere "terrorismoaren aurka batasunez eta sendotasunez".

Donostian eskaini duen prentsaurrekoan, Astudillok adierazi du "demokratek demokraziarekin eta zuzenbide estatuarekin, bakearekin eta askatasunarekin dugun konpromisoa indartu behar" dutela.

"Batasunetik eta terrorismoaren kontrako tinkotasunetik egin behar dugu, indarkeria erabiltzen dutenak isolatuz eta indarkeriak zentzurik ez duela sinestaraziz, inora eramaten ez duelako, bueltarik gabeko bidea baita", azpimarratu du.

Basagoitik "erabateko babesa" eskaini die bai Lopezen Gobernuari eta baita Espainiakoari ere

Antonio Basagoiti Euskadiko PPko presidenteak "erabat" gaitzetsi du ETAren atentatua eta bai Patxi Lopezen Gobernuari eta baita Espainiako Gobernuari ere bere babesa eskaini die ETA "berriz mehatxua izan ez dadin eta bakean eta askatasunean bizi ahal izateko".

"Badakigu zelan sentitzen diren eurak bezala sentitu izan garelako behin baino gehiagotan. Gure babesa, hurbiltasuna eta elkartasuna eskaintzen dizkiegu", azaldu du.

Basagoitiren ustetan, "terrorismoarekin buka daiteke, familia bat orain gaizki pasatzen ari bada ere" eta beharrezkotzat jo du "legea erabiltzea eta terrorismoak legitimazio sozialik ez izatearen alde lan egitea" ETAk gero eta babes gutxiago izan dezan.

Ezenarrok atentatua gaitzetsi du eta "honelako sarraskien aurrean isiltasuna haustea" eskatu die abertzaleei

Aintzane Ezenarro Aralarko legebiltzarkideak atentatua "gogor" gaitzetsi du eta "herrialde honetan ezkerrekoak eta abertzalekoak diren pertsona guztiei, honelako sarraskien aurrean isiltasuna haustea" eskatu die.

Ezenarrok "herrialde honentzako ezkerreko eta abertzalea izango den etorkizuna eraiki" nahi duela esan du, bere ustez, "horixe baita geure herrialdearentzako proiekturik onena. Hori bai; guk politikaren bidea baino ez dugu erabiliko", azaldu du.

Larrazabalek (EA) sentitzen dutena esatea eskatu die herritarrei

Jesus Maria Larrazabal Eusko Alkartasunako legebiltzarkideak heritarrei "ETAren indarkeriaren aurrean pentsatzen dutena eta sentitzen dutena esatea" eskatu die

Larrazabalek atentatua gaitzetsi egin du eta "gaur suntsituta dagoen familia bat den horri" babesa, elkartasuna eta hurbiltasuna helarazi die.

Gainera, azpimarratu de gizarteak giza eskubideen defentsan bizitzarako eskubidea defendatu behar duela eta "gauzak ez direla konpontzen jendea erailez".

Aranak (EB) "behingoz armak uzteko" exigitu dio ETAri

Mikel Arana Ezker Batua Berdeak taldeko koordinatzaileak "gogor" gaitzetsi du Arrigorriagako atentatua eta "euskal gizartearen gehiengoak eskatzen duen bezala, armak uzteko" exigitu dio ETAri.

Komunikatu baten bidez, Aranak, EBren izenean, elkartasuna helarazi nahi izan die biktimaren familiari eta lankideei, baita Estatuko Segurtasun Indarrei ere. Horiei "bere babes eta hurbiltasun guztia" eskaini die.

Hala, EBko ordezkaritza bat, Arana bera buru duela, atentatua gaitzesteko egiten den ekitaldi orotan egongo dela adierazi du.

Rosa Diezek ETAren aurkako "akordioa sendotzea" eskatu du eta "itxaropen faltsuak" ukatu ditu

Rosa Diez UPyDko Kongresuko diputatuak esan du ETAren azken atentatuaren ostean "terroristak deusezteko akordioa sendotzeko ordua" iritsi dela eta azpimarratu du borroka horretan ezin dela egon "itxaropen faltsurik eta ezin dela "amore eman".

"Minaren aurrean, terroristekin amaitzeko akordioa indartzeko garaia da. Ez dago itxaropen faltsurik ezta zentzurik gabe amore ematerik ere. Izuarekin 40 urtez bizi ostean , herritarren batasunak eta arrazoi demokratikoek baino ez dituzte ETA eta bere ingurua garaituko", adierazi du.

Legez kanpo dagoen ezker abertzaleak esan du beharrezkoa dela "gatazka politikoa konpontzea"

"Eduardo Puelles Garciaren heriotza, azken asteotako atxiloketak eta Jon Anzaren desagerpenak argi uzten dute Euskal Herrian bizi dugun gatazka politikoaren gordintasuna", adierazi dute komunikatu batean.

Gainera, legez kanpo dagoen ezker abertzaleak esan du beharrezkoa dela "premiaz gatazka politikoari heltzea eta askatasunean eta herri honen eskubideetan oinarritutako eszenatoki demokratikoa lortzea".

Atentatua "gizartearen aurkako eraso zuzena" da, Carlos Garcia Adaneroren hitzetan (UPN)

ETAk egindako atentatua "gizartearen aurkako eraso zuzena" dela esan du Carlos Garcia Adanero Union del Pueblo Navarro alderdiko idazkari nagusiak.

Hildako Espainiako Poliziako inspektoreak herritarren "eskubideak eta askatasunak" bermatzeko egitekoa zuen, legeak hala aginduta. Ondorioz, "bere hilketa gizartearen aurkako eraso zuzen bat izan da", UPNko ordezkariaren ahotan.

"Erasoa gaitzesteko ekitaldietan parte hartzeko dei egin" die Nafarroa Baik herritarrei

Hilketa gaitzesteko ekitaldietan parte hartzeko dei egin dio Nafarroa Baik euskal gizarteari.

Nafarroako Parlamentuan aurkeztutako testu batean, polizia nazionalaren "erailketa zitala" eta atentatu "basatia" gaitzetsi ditu NaBaik eta "erasoa gaitzesteko ekitaldietan parte hartzeko dei egin" dio euskal gizarteari.