Politika

Nafarroako Gobernuak “gogor” gaitzetsi du Arrigorriagan ETAk egin duen “hilketa koldarra” eta Jaurlaritzari terrorismoaren kontra “indar guztiekin” lagunduko diola agertu du.

Miguel Sanz gobernuburuak eman du Gobernuak onartutako testuaren berri, eta bertan atentatuak “bizitzeko eskubidearen mespretxua” erakusten duela eta “biktimak erakundeen eta Legearen zerbitzura” lan egiten zuenez “gaitasun demokratikoa deuseztatu” nahi duela azaltzen dute.

Gobernuaren eta “Nafarroako gizartearen” izenean “doluminak eta elkartasuna” helarazi die Eduardo Puellesen emazteari, seme-alabei eta sendiari.

Era berean, doluminak eman dizkie “Eusko Jaurlaritzari eta Patxi Lopez lehendakariari hilketa krudelak sortutako momentu txarrak bizitzea egokitu zaiolako”.

Hori dela eta, Nafarroako Gobernuak ETAren kontra egiteko “indar guztiekin” lan egiteko prestutasuna eskaini dio, “mehatxuan eta hilketan babestuta gizarte demokratikoa izutu nahi duten kriminal guztiak” harrapatzeko.

Estatuko Segurtasun Indarrei eta Espainiako Poliziari ere “elkartasuna, doluminak, babes politiko pertsonala eta instituzionala” helarazi die “horien bitartez terrorismoaren gaitza amaitzeko”.

Azkenik, deia egin die herritarrei “indarkeriaren kontrako manifestazioetan parte har dezaten”.