Politika

Eduardo Puelles iragan ostiralean ETAk bonba-auto baten bidez hildako polizia nazionalaren omenaldi ekitaldiekin jarraituko dute astelehen honetan.

Eusko Legebiltzarrak omenaldia egingo dio gaur Gasteizeko egoitzan. Bertan, Puellesen alarguna eta semeak egongo dira, terrorismoaren biktimen elkarte gehienen ordezkariez gain.

Ekitaldia 13:00etan izango da Legebiltzarraren kanpoaldean, terrorismoaren biktimen omenez jarritako eskulturaren ondoan.

Arantza Quiroga Legebiltzarreko presidenteak elkarretaratzea deitu du egoitzaren aurrean 12:45erako.

Ondoren, Legebiltzarra osatzen duten talde guztiek adostutako adierazpen bat irakurriko dute atentatua gaitzesteko.

Eusko Legebiltzarrak horrelako ekitaldi bat antolatzen duen laugarren aldia da. Lehenengoa, iragan urteko maiatzean izan zen, ETAk Juan Manuel Piñuel guardia zibila hil zuenean Legution. Bigarrena irailean izan zen Luis Conde armadako brigadaren heriotzagatik eta hirugarrena abenduan, Inaxio Uriaren aurkako atentatuaren ostean.