Politika

Bilboko Abusu auzoko 300 bizilagun baino gehiagok Eduardo Puellesen familiari elkartasuna adierazi diote gaur eta isilean kontzentrazioa egin dute. ETAk hil zuen Puelles Polizia Nazionaleko inspektorea iragan ostiralean, Arrigorriagan.

19:45ean hasi da kontzentrazioa Ibai Eder parkean, ''Por la libertad. ETA no. Askatasuna. ETA ez'' zioen pankarta bat buru zuela. Pankarta horren atzean, besteak beste, Paqui, Ruben eta Asier hildako poliziaren alarguna eta semeak, Josu bere anaia eta beste senitarteko batzuk.

Horrez gain, Mikel Cabieces Espainiako Gobernuko ordezkaria EAEn, Rodolfo Ares Herrizaingo sailburuak, Jose Antonio Pastor Bizkaiko sozialisten idazkari nagusiak, Antonio Basagoiti Euskadiko PPko presidenteak eta Bilboko Udaleko EAJko, PPko eta PSEko zinegotziek parte hartu dute elkarretaratzean.

15 minutu isilean izan ostean, txaloak jo dituzte partehartzaileek Abusuko El Buen Pastor eta Santa Teresita elizetara joan aurretik. Bertan Eduardo Puellesen oroimenez meza egin dute.

Ares

Kontzentrazioaren amaieran, Eduardo Puellesen familia babesteko iragan larunbatean Bilbon egindako manifestaldi jendetsuaren inguruan piztutako polemikarekin amaitzeko eskatu die Rodolfo Ares Herrizaingo sailburuak alderdi politikoei.

"Denak batera izan ginen manifestazioan eta hori da euskal gizarteari helarazi diezaiokegun mezurik hoberena, eta baita ETAri ere", goraipatu du.