Politika

Frantziako segurtasun indarrek ETAko bi ustezko kide atxilotu dituzte auto-istripua izan dutenean, ikerketako iturriak aipatuta Efe albiste-agentziak jakitera eman duenez.

Mayenne departamenduko Chateau-Gontier udalerrian (Le Mansetik gertu, Frantziako Estatuko ipar-mendebaldean) gertatu da istripua, aipatu iturrien arabera.

Gizonezko bat eta emakumezko bat dira atzemandakoak, baina ez dute haien izena oraindik zabaldu. Hala ere, Alfredo Perez Rubalcaba Barne ministroak azaldu du gizonezkoa larri zauritu dela, eta emakumezkoaren izena Ohiana Mardaras dela zabaldu den arren, ez dago argi oraindik hori bere nortasuna denik.

ETAko bi ustezko kideek armak zeramatzaten eta lapurtutako auto batean zihoazen, ikerketako iturriek zehaztu dutenez.

Autoaren barruan pistola bat eta errebolber bat aurkitu dituzte, aipatu iturrien arabera. Emakumeak bere izena eman du, baina Polizia ikertzen ari da benetakoa den ala ez, gezurrezko izena eman duela susmatzen dute eta.

Miaketak

Polizia Nazionaleko agenteek bi etxebizitza miatu dituzte Bilbon, istripua izan ostean atxilotutako ustezko ETAko kide batekin harremana dutelakoan. Poliziako iturriek jakinarazi dutenez, atxilotutako emakumearen gurasoen etxebizitzak dira biak.

Atzo atxilotutako lagun bat aske geratu da

Bitartean, atzo Ipar Euskal Herrian atxilotutako lagunetako bat aske geratu da. Beste guztiak Poliziaren egoitzan jarraitzen dute, Baionan.