Politika

EAJ

Joseba Egibar EAJko bozeramaileak epaia irakurri arte itxaron nahi duela esan du, "edukia" ezagutzeko. Izan ere, une horretan lehen informazioak baino ez zituela esan du.

Enpleguari buruz Gasteizen eskainitako prentsaurreko batean, buruzagi jeltzaleak adierazi du legez kanpo utzitako zerrenda bateko hautagai batek hautatua izateko eskubidea duen jakin nahi duela, eskubide hori ukatzeak "oinarrizko eskubideak urratu" egingo lituzkeelako.

PSE

Oscar Rodríguez Eusko Legebiltzarreko PSEko parlamentariaren ustez, ETAren aurkako eta Espainiar legegintzaren aldeko "onespena" suposatzen du. Gainera, Espainiako demokrazia legezkotzat jo eta sendotu egiten du.

Era berean, zuhur jokatu behar dela adierazi du; izan ere, oraindik ez da ezagutzen sententzia osoa. Hala ere, "orain arte jakin dugun guztia berri ona da", esan du.

&' || 'nbsp;

PP

Antonio Basagoiti EAEko PPko presidentea pozik agertu da epaiarekin, eta hemendik aurrera ezker abertzalea ezin izango dela beste hauteskundeetan "amarruz aurkeztu" goratu du. Gainera, epaileen erabakiak EAE-ANV Udaletatik "ateratzea" ekar lezakeela ziurtatu du.

Buruzagi ''popularrak'' eskari zehatza egin dio EAJri: Gain honekin ez tematzeko eta "terrorismoa udaletxeetan, parlamentuetan eta beste inon defendatzea ezin dela justifikatu" ikusarazten laguntzeko.

Aralar

Patxi Zabaleta Aralarreko koordinatzaile nagusiak esan du epaia "albiste txarra" dela "demokraziarentzat" eta "demokrazia heldu batek" bermatu egin behar duela "ideia guztiak defendatu ahal izatea" eta "alderdi politiko guztien jarduna", "baldin eta jokabide zibiletatik egiten baldin badituzte".

Agiri batean, Aralarrek elkartasuna adierazi die "legez kanporatutako alderdiarekin bat egiten duten milaka herritarrei". Gainera, "milaka herritarren babesa duen alderdi baten legalizazioa" beharrezkotzat jo du, "ez dagoelako herritar ilegalik".

EA

Epaia "demokraziarentzako eta Euskal Herriarentzako albiste txarra" dela esan du Maiorga Ramirez Eusko Alkartasunako bozeramaileak.

"Europako testuinguru politiko, legal eta juridikoa gero eta murriztaileagoa da", Ramirezen arabera. Izan ere, "ekintza prebentiboa askatasun indibidualen eta kolektiboen gainetik jarri dute".

EB

Serafin Llamas EBko Presidentetzako bozeramaileak esan du ezin dutela bere alderdia behartu Alderdien Legea "demokratikotzat jotzera", "ez baita demokratikoa".

Edonola ere, ezker abertzaleak "hausnarketa" egin behar duela iritzi dio, "ETAri aurre egin eta politika egin dezala nahi baitute herritar gehienek".

UPyD

Rosa Diez UPyDko legebiltzarkideak azpimarratu du epaiak baieztatu egiten duela "batzuok urte askoz defendatu izan duguna, Alderdien Legeak ez dituela ideiak legez kanpo uzten, baizik eta haien ekintzengatik Legetik kanpo daudenak jazartzen dituela".

"Txapelak jantzita bizitzen aurka atentatuak egiten dutenen eta politikari jantziekin Udaleko bilkura batera joan eta ideia horiek defendatzen dutenen aurka Zuzenbide Estatuaren baliabide guztiak erabiltzea eskatzen jarraituko du UpyDk", gaineratu du Diezek ohar batean.