Rodolfo Ares Eusko Jaurlaritzako Herrizaingo sailburuak adierazi duenez, Arnaldo Otegi ezker abertzaleko buruzagiak Estrasburgoko Auzitegiak emandako epaiaren (Batasuna legez kanporatzearen alde agertu zen) ostean adierazitakoak "sinesgarritasun gutxi" du, ez zuelako "aldaketarako gogoetarik egin". Horregatik, eta ezker abertzaleko boto emaileen "zati handi batek, politikaren aldeko apustua egin duelako", Aresek uste du "ezker abertzaleak errieta" egin beharko liokeela Otegir.

Radio Euskadiri eskainitako elkarrizketan, Ares gustura agertu da Giza Eskubideen Auzitegiak emandako ebazpenarekin, izan ere, Espainiako "demokrazia kalitate eskasekoa zela ziotenak erratuta zeudela konturatu behar dira. Aho batez hartutako erabaki da".

Buruzagi sozialistak gogor kritikatu du Otegi, Europako Auzitegiaren erabakiaren odnoren ezker abertzalearen estrategia ez zela aldatuko esan zuelako, eta "ETA babesteko politikarekin" jarraituko duelako.

Udalei dagokienez, Herrizaingo sailburuak esan du Estrasburgoren erabakiak "garrantzia" izango duela, "sigla gehiagori eragingo dielako". Hori dela eta, ezker abertzaleko kideei mezua luzatu die: "Erabakia hartu behar dute, giza eskubideak errespetatzen dituen alderdi bat osatu behar dute. Ordezkaririk ez badute, haien errua da".

ETAren kontrako borroka

Aresek esan du ETAren kontrako borrokan lehen ez zegoela "orain dagoen sintonia eta bat egitea" Espainiako eta EAEko gobernuen artean. Gainera, Aresek gogorarazi du Alfredo Perez Rubalcaba Barne ministroaren oso laguna dela eta hori "oso positiboa" dela, izan ere, "helburu berak ditugu".

Bere Sailaren lehentasun nagusia ETAren kontrako borroka dela azpimarratu du eta esan du horretarako terrorismoaren aurkako taldea eratu dutela. Hezkuntza eta Justizia sailekin batera bake plana adosteko bidean daudela ere jakinarazi du, "etika eta bizikidetza baloreak" zabaltzeko asmoz.

Ertzaintza eta Schengen

Barne ministroak Ertzaintzak Schengen akordioaren baitan lan egingo zuela hitz eman zuela ekarri diote gogora Aresi Radio Euskadin. Herrizaingo sailburuak esan du helburu hori lortzeko "Espainiako eta Frantziako gobernuekin negoziatu" behar dutela eta "terrorismoaren kontra" eraginkortasuna lortzea bada helburua, ahal dutena egingo dutela.

Presoen aldeko kartelak eta pintadak

Aresek esan du bere Sailak "Legea aplikatu" nahi duela, eta "kasu honetan terrorismoaren biktimena". Hala, ETAri erreferentzia egiten dioten irudi guztiak desagerraraziko dituztela esan du, zeren "ez da inpunitate espaziorik egongo Legearen kontra egiteko".