Politika

Idoia Mendia Eusko Jaurlaritzako bozeramaile eta Justizia eta Administrazio Publikoetako sailburuak iragarri du PSOEk babestu egingo duela Kongresuan euskal Kontzertua blindatzeko.

Hain zuzen ere, Estatuko bi lege organikotan aldaketak egitea onartuko dute.

Proposamena Eusko Legebiltzarreko talde guztietatik dator, alboko erkidegoek eta zenbait sindikatuk Kontzertuaren aurka helegite gehiago aurkeztea saihesteko.

Cadena Ser irrati-katean eskainitako elkarrizketa batean, Mendiak gogorarazi du azken legegintzaldian Eusko Legebiltzarretik lege-proposamen bat igorri zela Diputatuen Kongresura. Proposamena urrian eztabaidatuko dute, foru arauak lege bihurtzeko helburuz.

EAJk nabarmendu du Kontzertua blindatzea ezinbestekoa dela Madrilen Aurrekontuak babesteko.

"Goiz" 2011ko hitzarmenetaz hitz egiteko

Bestalde, Mendiak adierazi du oraindik&' || 'nbsp; "oso goiz" dela 2011ko hitzarmenetaz hitz egiteko, bi urte barru izango diren udal eta foru hauteskundeen inguruan.

Horrez gain, gogora ekarri duenez, bere alderdiak beti nahiago izan du "hitzarmenei buruz hauteskundeen biharamunean hitz egitea, herritarrek hitz egin" ostean.

Ildo horretatik, Mendiaren esanetan, PSE-EEk "logikoki, erakundeetan emaitzarik onenak lortzea espero du. Hortik aurrera, ikusteko dago zer nolako itun eta hitzarmen lor daitezkeen, momentuz guk nahi duguna emaitzarik onenak lortzea da eta, noski baietz, hauteskundeetaz hitz egiteko goizegi da nire ustez".