Politika

Idoia Mendia Eusko Jaurlaritzako bozeramaileak igandean egindako adierazpenei buruz horrela mintzatu da Jose Antonio Alonso PSOEko bozeramailea. Izan ere, PSOEk ekimena Madrilen babestuko zuela iragarri zuen Mendiak. "Eusko Jaurlaritzak dioen guztia errespetagarria da, baina bozkatuko dena hemen erabakiko da", adierazi du Alonsok.

Eusko Legebiltzarrak kontzertu ekonomikoa blindatzeko proposamenari buruz Talde Sozialistak botoa "eztabaidatu" ez duela ziurtatu du Alonsok eta "itxaropen gehiegi" ez izatea eskatu du. Blindatzearen alde azaltzea Estatuko Aurrekontu Orokorretan EAJren babesa izatea ekarriko lioke PSOEri.

Era berean, Aurrekontuen lege-proiektua Ministroen Kontseiluak larunbatean onartu ostean, PSOE talde parlamentarioekin bilduko da, EAJ barne, baina ordura arte "ezin dezakegu baietz edo ezetz esan".

"Arazo tekniko nabariak"

Bestalde, kontzertu ekonomikoaren blindatzeak konpondu beharreko "arazo tekniko nabariak" planteatzen dituela onartu dio Elena Salgado Espainiako Gobernuko presidenteordeak EAJri.

Horrela azaldu du Josu Erkoreka EAJko bozeramaileak prentsaurrekoan, Diputatuen Kongresuan, Salgadorekin bildu ostean. Edozein kasutan, kontzertu ekonomikoaren blindatzearekin konpromiso "serio, irmoa eta eraginkorra" izatea eskatu dio Erkorekak PSOEri. Blindatzea urriko bigarren astean Ganberan eztabaidatuko dute.

Eusko Legebiltzarrak proposamena aho batez onartu zuela gogorarazi du EAJko bozeramaileak, horregatik koherentzia eskatu die PSOEri eta PPri, beraien alderdiek EAEn bozkatutakoa babes dezaten.