Politika

Diputatuen Kongresuak Kontzertu Ekonomikoaren "blindatzea" babestuko du, azkenean PPk aldeko bozka emango ez duen arren.

Diputatuen Kongresuak babestu egingo du euskal Kontzertu Ekonomikoa, izan ere, PPk aldeko bozka egingo ez duela adierazi duen arren, (ez dute argitu kontra bozkatuko duten edo abstenitu egingo diren) PSOEk iragarri du neurriaren aldeko bozka emango duela.

Hala ere, euskal politikagintzako ordezkarien erreakzioak azkar iritsi dira eta besteak beste, Diputatuen Kongresuak Kontzertua PPren babesik gabe "blindatzeak" duen ondorioen inguruan mintzatu dira.

EAJk eusko Legebiltzarrarekin "leialak" izatea eskatu die taldeei

Josu Erkoreka EAJko Kongresuko bozeramaileak esan du bere gogobetetzea "erdizkakoa" dela, izan ere, Kongresuak Kontzertuaren blindatzea tramitera onartzea ona da, baina azpimarratu du talde politikoek "leialak" izan behar direla eusko Legebiltzarrarekin.

Erkorekak Kongresuko korridoreetan egin ditu adierazpenok Eusko Legebiltzarraren lege proposamenaren inguruko eztabaida amaitutakoan. Azkenean, lege proposamenak aurrera egingo du baina UpyD eta PPren babesik gabe.

Erkorekaren aburuz, gaurkoa aurrera pausoa da, baina gogobetetasuna "ez da osoa, zatikakoa eta mugatua da".

Sentsazio hori azaltzeko argudiatu du lehendabizi, Kongresuak ez duela ahobetez onartu Legebiltzarrean gertatu zen bezala eta dagoeneko "batzuk " (PPrengatik) "akordioa baztertzen" hasi direla.

Gainera, esan du gogobetetasuna ez dela erabatekoa izango EAJrentzat gaurko "hasierako puntua helmuga izan arte", eta erantsi du momentu bien artean hilabeteak iraungo dituen tramitazioa dagoela Kongresua eta Senatuaren artean.

PSEren ustez, Kontzertuaren "blindatzea" ez da "inondik inora ere" euskaldunen pribilegioak sendotzea

Jose Antonio Pastor PSEren eusko Legebiltzarreko bozeramaileak azpimarratu du Kontzertu Ekonomikoa "blindatzeko" proposamenak ez duela suposatzen "inondik inora ere" euskaldunek espainiarrekin alderatuz pribilegioak dituztela, baizik eta, arautegi fiskalak duen tratamendua "berdindu" egiten dela "aldundien arauekin".

Modu horretan, azaldu du, aldundien araudiak beste edozein erkidegoko edozein legek duen legezko tratamendu bera izango lukeela.

Eztabaida amaitutakoan, eta bozketa baino lehen, Pastorrek deialdia egin du Diputatuen Kongresuan, eusko Legebiltzarrean gertatu zen bezala, ahobeteko akordioa lortzea tramiteak aurrera egin dezan.

Euskadiko PPko hiru diputatuak ez dira bozketan egongo

Euskadiko PPko hiru diputatuak ez dira Kongresuan egongo bozketaren unean, PPk ez baitu eusko Legebiltzarrak Kontzertu Ekonomikoa blindatzeko egin duen lege proposamena babestuko, eta erabaki horrekin ados ez daudela adierazi nahi dute.

Oraindik PPk ez du argitu Kongresuan lege proposamenaren aurkako bozka egingo duten edo abstenitu egingo diren, baina hala ere, Euskadiko PPk prentsa-ohar baten bidez adierazi duenez, erabakia "errespetatu" egiten dute, baina, ez dute ezezkoa "partekatzen".

Alfonso Alonso, Jose Eugenio Azpiroz eta Ignacio Astarloa Ppko hiru diputatuak bozketan ez egotearekin, Euskadiko PPk Kontzertu Ekonomikoarekin eta euskal aldundiekin "beti izan duen konpromezua indartu" nahi du.

Euskadiko PPren ustez, euren alderdikideen erabakia, EAJk tramitazio hau eta Estatuko Aurrekontu Orokorrak lotzearekin "tematu" izanaren eta "PSOEk gai bi hauek banatzeko erakutsi duen borondate ezaren emaitza" da.

"EAJk erabili duen planteamenduaren helburu bakarra Espainiako Gobernuari xantaia egitea izan da, izan ere, PSOEk euskal Kontzertu Ekonomikoaren alde egitea, Aurrekontuak babesteko ezinbesteko baldintza bezala erabili dute", azaldu dute prentsa-oharrean.

Euskadiko PPren ustez, erantzukizuna EAJrena da "xantaia aurkezteagatik" eta PSOErena "xantaia hori onartzeagatik".

NaBaik PPrenak bezalako "kontraesanak" aztertzeko "hausnarketarako" deialdia egin du

Uxue Barkos Nafarroa Baiko Kongresuko diputatuak esan du eusko Legebiltzarraren lege proposamenak aurrera egitearen alde dago eta gaitzetsi egin du "PPren hitzaldian kontraesanak daudela eztabaida zein Ganberetan den arabera ".

Ildo horretatik NaBaiko diputatuak PPrenak bezalako "kontraesanak" aztertzeko "hausnarketarako" deialdia egin du.

"Ez gabiltza geure egitura fiskalaren inguruko eztabaida bat irekitzen, geure berme juridikoen inguruan gabiltza; beraz, ez da eztabaida fiskala, juridikoa baino", erantsi du.