Politika

Espainiako Poliziak 10 pertsona atxilotu ditu astearte arratsaldean Gipuzkoan, tartean Arnaldo Otegi ezker abertzaleko bozeramaile ohia, Rafa Diez Usabiaga LABeko idazkari nagusi ohia eta Rufi Etxeberria ezker abertzaleko buruzagi historikoa. Albiste-agentziek iturri juridikoak aipatuta zabaldu dutenez, Batasunaren Mahai Nazionala berriro osatzea ekidin nahi izan dute operazio honekin.

Polizia-operazioa Baltasar Garzon epaileak agindu du. Gainerako atxilotuak ondoko hauek dira: Sonia Jacinto EHAK-ko diruzaina izandakoa eta Arkaitz Rodriguez Donostian, Jose Manuel Serra Hernanin, Amaia Esnal Urnietan (Gipuzkoa) eta Miren Zabaleta (Patxi Zabaleta Aralarreko buruzagiaren alaba) eta Jose Luis Moreno Sagues Iruñean.

Gainera, Nafarroako hiruburuan beste lagun bat atxilotu dute Miren Zabaletaren etxetik agiriak eta dokumentazioa ateratzen ari zenean, Barne Ministerioak jakitera eman duenez. Ainara Oiz Elgorriaga da atxilotua eta dokumentuak zeramatzan Poliziaren eskuetan izatea ekiditeko, Ministerioak komunikatu baten bidez jakinarazi duenez.

Ustez indarkeriatik aldentzeko zorian zeuden

Antza denez, atxilotutakoak Batasunaren zuzendaritza berriro osatzen saiatzen ari ziren, Bateragune izeneko elkarte baten bidez, indarkeriatik aldenduz berriz legezkoak izateko helburuz.

Bide horretatik mintzatu da Ainhoa Etxaide LABeko idazkari nagusia ere, Donostiako egoitzatik bertatik. Izan ere, Etxaidek kritikatu egin du Garzonek "Euskal Herriko mapa politikoan barrena" egin izana "gauza berriak" gertatzeko zorian daudenean.

"Badakite ezker abertzalea eskaintza politikoa egiteko, urrats berriak egiteko eta bide berriekin konpromisoa hartzeko prest dagoela. Eta horri jazarpenaren bidez erantzuten ari dira", gaineratu du.

Horren harira, Otegi "emaitzak emateko zorian" zegoen "ekimen politiko sakona" prestatzen ari zela publikatu du Gara egunkariak asteazken honetako alean.

Dena dela, iturri juridikoek ziurtatu dutenez, Garzonek uste du Batasunaren zuzendaritza berria ETAren aginduen menpe zegoen.

Francisco Caamaño Espainiako Gobernuko Justizia ministroak polizia operazioa defendatu du Mexikotik: "Uste dut epailea legez kanpoko alderdi baten antolakuntza berriz osatzea galarazten saiatzen ari dela. Beraz, legea betetzen ari da".

Caamañok ohartarazi du Espainiak ez duela onartuko "legez kanpoko erakunde politikoak berriro sortzea".

Jazarpen berezia

Ikerketako iturriek azaldu dutenez, atxilotuei jazarpen berezia egin diete Informazio Zerbitzuek, izan ere, Batasunako zuzendaritza berriz osatzen ari zirela uste zuten, 2007an Seguran (Gipuzkoa) egindako operazioan desegin ostean.

Terrorismoa goraipatzeagatik 15 hilabeteko kartzela-zigorra bete ostean duela urtebete atera zen espetxetik Otegi eta Auzitegi Nazionalak beste epaiketa bat abian jarri du ezker abertzaleko agintariaren aurka, 2004ko azaroaren 14an, Anoetako belodromoan, egindako ekitaldian egindako delitu batengatik.

Rafa Diez, atxilotuta lehen aldiz

Lehen aldia izan da Rafa Diez LABeko idazkari nagusi ohia atxilotu dutela, aldez aurretik auzi batzuetan deklaratu behar izan bazuen ere.

Gainera, sindikatu abertzalearen egoitza arakatu duten lehen aldia izan da ere.

Operazioan atxilotutakoen etxebizitzak ere miatu dituzte, eta ondoren Madrilera eramango dituzte epaileen esku uzteko.

LAB

Asteazken honetan, operazioaren "premiazko" azterketa bat egingo duela iragarri du Ainhoa Etxaide LABeko idazkari nagusiak. LABek "mobilizazioak deituko ditu Garzonen eraso berri honen ostean, Euskal Herriko marko politikoan indarka sartzen baino ez dakielako, gauza berriak ikusteko gutxi falta zenean", Etxaideren hitzetan.