Politika

Francisco Camps Valentziako PPko presidenteak alderdiko zuzendaritza nazionalaren aginduak bere egin ditu eta Ricardo Costa PPCVko idazkari eta bozeramailea kargutik kendu du.

Valentziako Batzorde Exekutiboak erabakia hartu ostean bi zuzendaritzek desadostasunak agerian utzi zituzten bart, baina azkenean kargutik kentzea erabaki du Campsek. Idazkari nagusiko kargua aldi baterako uztea proposatu zuen Costak batzorde horretan, PPk ''Gurtel'' auzian duen parte-hartzea ikertzea erabakitzen baldin bazuen.

Costa PPCVko idazkari nagusi berriz izatea "ezinezkoa" zela esan du goizean Maria Dolores de Cospedal PPko idazkari nagusiak, Costak izandako jarrera ikusita. Gainera, alderdian ardurak izaten jarraitzeko ahalegina bertan behera uzten ez badu, Costa militantziatik at geratzea ez du baztertu Cospedalek.

Madrildik Costa kargutik kentzeko eskatu ostean, Camps Valentziako Parlamentura joan da goizean, bertan Costarekin eta talde parlamentarioarekin bildu da, eta kargutik kentzeko erabakiaren berri eman die.