Politika

Andoni Ortuzarrek gaur jakinarazi duenez, "oinarri zabaleko aurre-akordio bat dago" Eusko Jaurlaritzak Alderdi Popularrarekin adostu dituen aurrekontuak babesteko. Iñigo Urkullu EAJren presidenteak ETB adierazi duenez, Jaurlaritzaren, diputazioen eta udalen aurrekontuak onartzeko akordio hori asteburua baino lehen itxi daiteke.

Radio Euskadin egindako elkarrizketan, Ortuzarrek erantsi du EAJ eta Alderdi Sozialistaren arteko elkarrizketa "oso aurreratuta" daudela eta oinarrizkoan puntuetan aurre-akordio batera iritsi direla dagoeneko.

EAJren buruzagiak azaldu duenez, euren helburua ez da "zuzenketa jakin batzuk aldatzea", "gure helburua akordio makroekonomiko bat erdiestea da, krisiari aurre egiteko erakunde guztiak norabide berean jartzeko".

Abortuaren Legearen Erreforma

Bestalde, EAJk Abortuaren Legearen erreforma babesteko, testuari egingo dizkion zuzenketa partzialak onartu beharko dituztela azpimarratu du.

Ortuzarrek esan duenez, EAJ "ez da abortuaren aldekoa", baina "errealitate bat da urtero Euskadin nahiz kanpoan abortatzen duten gazteak milaka direla". Bere iritzian, praktika hori erregulatzen duen legea "zahartuta geratu da" (24 urte ditu arauak), "eta pertsonei nahiz osasun arloko profesionalei babes juridikoa eman behar zaie".

EAJk ez du osoko zuzenketarik egingo; baina, aldiz, zuzenketa partzialak aurkeztuko ditu. "Bizitza-eskubidearen eta norbere sexualitatea libreki aukeratzeko eta ugalkortasuna babesteko oreka bat lortu behar da", adierazi du.

Gauzak horrela, zuzenketa partzial horiek aurrera egiten ez badute, EAJk ez du erreformaren alde bozkatuko.