Politika

Idoia Mendia Eusko Jaurlaritzaren bozeramaileak gaur azpimarratu duenez, Hezkuntzarako diseinatu dituzten dekretu berriek "ez dute euskara arriskuan jartzen" eta, beraz, "ez dago alarmarako arrazoirik".

Aldaketa horiek babestez gain, "D ereduak martxan segituko" duela nabarmendu du.

Mendiaren hitzetan, "ez da ona Hezkuntza etengabeko gatazkan egotea". Ildo horretan, dekretu berriek lege betetzen dutela eta adostasunaren ondorio direla adierazi du. "Tontxu Campos aurreko Hezkuntza sailburuak apurtu zuen adostasun hori argitaratu zituen dekretuen bitartez", erantsi du.
Arantza Aurrekoetxea EAJko legebiltzarkideak "gehiegizkotzat" jo ditu Isabel Celaaren hitzak, izan ere, ikastetxeetan "doktrinamendu nazionalista" egitea leporatu zion Ibarretxeren Gobernuari.

"Atzokoan egindako adierazpenak tokiz kanpo daude. Gehiegizkoak dira eta haserrea eta amorrua baino ez dute eragiten gizartearen hainbat esparrutan", nabarmendu du.
Bestalde, Eusko Alkartasunak ere gogor kritikatu du plan berria. Azken urteotan "benetako elebitasunaren alde" egindako bidea "arriskuan jartzen ari da Jaurlaritza", salatu dute.

Iñaki Oyarzabal Euskadiko PPren idazkari nagusiaren iritzian, Eusko Jaurlaritzak Hezkuntza sisteman ezarri nahi dituen dekretu berriak "bide onetik doaz", eta ''Euskal Herria'' terminoa hizkuntza eta kultura esparruei aipu egiteko erabiltzea onargarria dela esan du.

Isabel Celaa Hezkuntza sailburuak atzo azaldu zuenez, euskara eta gaztelera maila berean izango dira "doktrinamendu nazionalista ekiditeko" eta ''Euskal Herria'' kontzeptua ez da erabiliko esparru politiko-administratiboari aipu egiteko.

Oyarzabalek ETBn egindako elkarrizketan esan duenez, "Alderdi Popularrean arrazoizkoa iruditzen zaigu ''Euskal Herria'' terminoa erabiltzea, betiere hizkuntza esparru bati edo errealitate kultural bati aipamena egiteko bada".

Buruzagi popularraren aburuz, aurreko gobernuek "doktrinamendu politikoa" egiteko erabili zituzten ikastetxeak eta oraingo Jaurlaritzak "eskolak despolitizatu nahi ditu".

Euskara babestearen alde agertu da, "baina inposaketa sahiestuz". Orain arte izan diren dekretuak "inposizioarenak" izan direla adierazi du, "euskara hezkuntza sistemaren hizkuntza nagusi bihurtzen zuelako eta gaztelera eskoletatik ezabatzen zuelako".

Euskal aurrekontuak

Bestalde, Oyarzabalek zehaztu du Alderdi Popularrak Jaurlaritzaren aurrekontuak onartzeko ezinbestekoa izango dela zorra mugatuta egotea. Nolanahi ere, PSEk horretarako konpromisioa hartu zutela gaineratu du.

Ildo horretan, PPk Gobernu sozialistari bere babesa ez diola "begiak itxita" emango azpimarratu du, "EAJk ez bezala".