Politika

PPko Eskubideen eta Bermeen Batzordeak alderditik egotzi du, kautelazko neurri gisa, Manuel Cobo Madrilgo alkateordeari, bere espedientea konpondu arte, alderdiko iturriek Eferi jakinarazi diotenez.

Madrilgo Udaleko alkateordeak Alderdi Popularraren Batzordeko presidentearen (Alonso Fernandez Mañueco) eta idazkariaren (Carlos Argos) aurrean agerraldia egin du gaur, Esperanza Aguirre Madrilgo erkidegoko presidenteari Caja Madrid kutxaren harira egindako kritikak azaltzeko.

Irteeran, Cobok esan du azalpenak emateko deitu diotela eta egin dizkioten galdera guztiak erantzun dituela. Atzo PPren zuzendaritzak egin zuen bileran, Alberto Ruiz-Gallardonen ondokoak ez zuen atzera egin eta esandakoak mantendu zituen, nahiz eta Madrilgo Alderdi Popularra publikoki kritikatzeagatik barkeman eskatu zuen.

Gauzak horrela, gaur PPren Eskubideen eta Bermeen Batzordeak Cobori espedientea irekitzea eta behin-behinean alderditik botatzea erabaki du. Espedientea argitu bitarteko erabakia da.

Madrilgo alkateordeak nabarmendu du erabakia onartzen duela eta, beraz, bete egingo duela. "PPren zuzendaritzaren erabakiak beti onartuko ditut, hala egin behar dugu alderdi handi honetako militanteok", erantsi du.