Politika

97,7 milioi euroko laguntza bideratuko dute eskolten segurtasun pribatuarentzat, Rodolfo Ares Herrizaingo sailburuaren hitzetan.

Gaur Eusko Jaurlaritzan Aresek jakitera eman dituen datuen arabera, Herrizaingo Sailak 710 milioi euroko aurrekontua izango du 2010ean; hau da, aurrekontu orokorren % 6,9 horretarako bideratuko dute. Gainera, Herrizaingo Saileko aurrekontuak % 4,4 gora egin du.

Bestalde, Ertzaintzak terrorismoari aurre egiteko zuzendaritza berriari 4,3 milioi euroko laguntza bideratuko dute datorren urtean. Unitate horrek 500 bat ertzaina izango ditu bere baitan.

Aresek azpimarratu duenez, langileen gastuek gora egin dute ertzainen kopuru handiagoari aurre egiteko. Datorren urtean 260 ertzain gehiago egongo dira, 8.000 agenteen kupoa betetzeko.

Langileen gastuek gora egiten badute, gainerako gastuen atalek behera egin beharko dute; ildo horretan, gastu arruntek % 5,8 egingo dute behera, transferentziek eta dirulaguntzek % 25 eta inbertsioek % 27.

Terrorismoaren Biktimei Laguntzeko Zuzendaritza

Hala ere, murrizpen hauek ez dute eraginik izango Terrorismoaren Biktimei laguntzeko Zuzendaritzan. Aresen hitzetan, 2010ean Zuzendaritza horrek ia 3 milioi euroko dirulaguntza izango du (% 9,5 gehiago).