Politika

Patxi Lopez lehendakariak iragarri duenez, bilera erronda bat irekiko du euskal alderdi politikoekin Gernikako Estatutua aldatzeko prozesu baten aukera aztertze aldera. Aldaketa horrek Gernikako Estatutuak "adina" adostasun "edo gehiago" beharko lukeela azpimarratu du.

Lopezek Gorka Maneiro UPyDren legebiltzarkideak eta Joseba Egibar EAJren bozeramaileak egindako galdera banari erantzun die kontrol saioan.

Maneirok Lopezi gogorarazi dionez, EAEko sozialisten hauteskunde programan Estatutua aldatzea aurreikusten zuten eta bide hori irekitzeko asmoa ote duen azaltzeko eskea egin dio.

Lehendakariak erantzun dio "alderdi guztiekin bilerak egiteko" asmoa duela "akordio bat lortzeko aukerarik ba ote dagoen ikusteko", baina argitu duenez, "Gernikako Estatutuak adinakoa edo handiagoa izan beharko da adostasuna".

Horren harira, argi adierazi nahi izan du "atzerapauso itzela" izango litzatekeela "Estatutuaren adostasuna alde bakar baten akordioarekin ordezkatzea". Izan ere, Lopezen arabera, “% 51ren gehiengo sinplea" ez da nahikoa.

Erreferendumean amaituko dena

Arauak ez direla absolutuak berretsi du, eta horregatik, "errealitate berriei eta herritarren beharrei" egokitu behar direla.

Azaldu duenez, testua "berritzeko" adostasuna lortzen badute, erreforma "Euskadin akordioa lortuta, Estatuarekin itunduta, eta gizarteak erreferendumean babestuta" egingo da, "eta inoiz ez porrotera zuzendutako abentura bakartien bidez".