Politika

Guardia Zibilak eta Espainiako Poliziak 34 pertsona atxilotu dituzte gaur goizaldean EAEn eta Nafarroan, Segi legez kanpoko gazte erakundearen aurkako operazio batean, Espainiako Gobernuko Barne Ministerioak baieztatu duenez.

Gainera, Laurence Le Vert epailearen aginduz Hendaian (Lapurdi) beste pertsona bat atxilotu dute, baina oraingoz ez dago argi Segiren aurkako operazioarekin zerikusia duen.

Aurreikuspena pertsona gehiago atxilotzea zen, 50 inguru, baina hainbat ez zeuden etxean eta ezin izan dituzte atzeman,&' || 'nbsp;Radio Euskadik informatu duenez.

Barne Ministerioaren arabera, atxilotutakoek "erantzukizunak" zituzten gazte erakundean. Hori dela eta, "ETAren harrobiaren" zuzendaritza "desegin"tzat jo du.

Garbi operazioa (hala jarri diote izena) goizaldeko lehen orduan hasi da eta Fernando Grande-Marlaska Auzitegi Nazionaleko epaileak agindu du. Epailea Donostiara bertaratu da, bi fiskalekin eta poliziaburuekin batera, koordinazio lanak egiteko. Operazioa zabalik dago oraindik, eta guztira 800 agente inguru ari dira parte hartzen.

Hain zuzen ere, azken urteetako polizia operazio handiena da gaurkoa.

Barne Ministerioaren arabera, herri hauetan egin dituzte atxiloketak: Bilbo, Iurreta, Sestao, Zamudio eta Galdakao Bizkaian; Iruña, Barañain eta Burlata Nafarroan; Donostia, Errenteria, Andoain, Billabona, Zaldibia, Tolosa eta Amezketa Gipuzkoan; eta Gasteiz Araban.

Atxilotutakoak Madrilerako bidean daude, eta hurrengo egunetan epailearen esku utziko dituzte.

Rodolfo Ares Eusko Jaurlaritzako Herrizaingo sailburuak adierazi du operazioaren helburua "legez kanpo utzitako erakunde hori zuzendaritza gabe uztea eta legez kanpoko jarduerak egiteko finantziazioa eskuratzen jarrai dezatela ekiditea" dela.

Miaketak

Halaber, iturri ofizialen arabera, agenteek 92 etxebizitza, gaztetxe eta taberna miatu dituzte.

Arakaketan hainbat gauza atzeman dituzte, tartean 6.000 euro, ETAren Zutabe aldizkariaren ale batzuk eta molotov koktelak egiteko materiala.

Abiapuntua, Ekaitz Sirventi atzemandako agiriak

Terrorismoaren aurkako borrokaren iturriek azaldu dutenez, Ekaitz Sirvent ETAko ustezko kideari atzemandako txostenak oinarri hartuta abiatu dute operazioa.

Segi ezker abertzalearen gazte erakundea da, eta Auzitegi Gorenak terrorista izendatu zuen 2007ko urtarrilaren 19an.