Politika

Milaka lagunek parte hartu dute presoen aldeko manifestazioan, Bilbon. Ekitaldia EAk, Aralarrek, ezker abertzaleak, Alternatibak eta Abertzaleen Batasunak (AB) antolatu dute ''Haien eskubideen jabe. Euskal presoak Euskal Herrira'' lelopean.

Ibilbide osoan ez dituzte presoen argazkirik erakutsi eta manifestazioa Bilboko udaletxearen aurrean amaitu da. Bertan Etxerat-eko bi kidek komunikatu bat irakurri dute "herrialdeko agente sozial, sindikal eta politikoei konpromezu zehatz eta eskuragarriak" eskatuz.

Presoen senideek, Espainiako eta Frantziako estatuetako kartzeletan dauden presoek "pairatzen dituzten tratuen berri ematen jarraituko dutela", adierazi dute, "kartzeletako politika kriminalarekin amaitzeko" helburuarekin.

Martxan Patxi Zabaleta Aralarreko koordinatzaile nagusia, Peio Urizar EAko idazkari nagusia, Oskar Matute Alternatibako bozeramalea eta legez kanpoko ezker abertzaleko Tasio Erkizia, Rufi Etxeberria eta Jone Goirizelaia izan dira.

Alderdiek deitutako manifestazioa Auzitegi Nazionalak Etxerat-ena galarazi ostean antolatu dute.