Politika

Alderdi politikoek lehenengo adierazpenak egiten hasi dira Baionako Poliziak judizialak atzo Tolosako (Frantzia) gorputegian topatutako hilotza Jon Anzarena dela baieztatu ostean.

EAJ

Emilio Olabarria Kongresuko EAJren Herrizaingo bozeramaileak, Jon Anzaren heriotzaren eta gorpuaren kokalekuaren inguruko gertaerak argitzea eskatu die Frantziako agintariei.

Ordezkari jeltzaleak ez du "desagertzearen inguruko arrazoien, ezta Anzaren heriotzaren egoeraren" inguruko "balore epaiketarik" egin nahi izan eta kasua argitu behar dela nabarmendu du.

Aralar

"Erantzukizun publikoak" izatea eskatu du Aralarrek, Anzaren desagerpenaren salaketaren ostean izandako "erantzukizun eza eta koordinazio faltagatik".

Alderdi abertzaleak "kezka" azaldu du ETAko kidearen desagerpena kasuak izandako "ibilbideagatik". Horrela, "gertatutakoa berehala argitzea ezinbestekoa" dela esan du Aralarrek, komunikatu batean.

EA

Anzaren heriotza argitzeko ikerketa bat eskatu die Ikerne Badiola Eusko Alkartasunako komunikazio idazkariak Espainiako eta Frantziako Estatuei. 11 hilabete desagertuta zergatik izan den argitzeko eskatu du Badiolak.

"Pertsona guztien giza eskubideak errespetatu behar" direla adierazi du EAko ordezkariak, "bakoitzaren inguruabarrak kontuan izan gabe". Zentzu horretan, Anzaren senideek eta lagunek, eta baita euskal gizarteak ere, "gertatutakoaren azalpen bat merezi dute", erantsi du.

EB

Mikel Arana Ezker Batua-Berdeak alderdiaren koordinatzaile orokorraren ustez, beharrezkoa da Jon Anzaren desagerketaren inguruan ikerketa "gardena, independentea eta objektiboa" egitea.

Prentsa ohar baten bidez, 2009ko apirilaren 18ko desagerpenaren eta Anzaren gorpuaren aurkikuntzaren inguruko "susmoak" daudela esan du Aranak. "Edo Poliziaren lardaskeri baten aurrean gaude edo berandu egindako identifikazio baten aurrefabrikatutako bertsio baten aurrean", adierazi du Aranak.