Politika

Markel Olano Gipuzkoako ahaldun nagusiak adierazi du "indarkeriaren amaiera" ezin dela oinarritu "proiektu politiko baten porrotean", kasu honetan "ezker abertzalearenean". Bere esanetan, izan ere, "ideia politiko guztiak demokrazian gaineratzea" izan beharko litzateke oinarria.

Olano Euskal Herriko Unibertsitatean (EHU) izan da gaur goizean, "Kultura politiko berria: Balioak, Gipuzkoaren erronka" udako ikastaroan "Gipuzkoa, gobernatzeko sistema berri baterako bidean" hitzaldia eskaintzeko.

Bertan hainbat agintari izan dira, hala nola Eneko Goia Bide Azpiegituretako diputatua, Eduardo Zubiaurre Adegiko presidentea eta Pedro Esnaola Gipuzkoako Merkataritza Ganberako presidentea.

Hitzaldian, Olanok nabarmendu du "funtsezkoa" dela euskal gizarteari "blindaje etikoa" ematea ETAren aurrean eta "terrorismoaren eta indarkeriaren biktima guztiak babestea". "Lehenago edo beranduago, indarkeria desagertu egingo da Euskadin", gaineratu du.

Bere aburuz, behin indarkeria amaitutakoan Euskadik haren "potentzial" osoa erakutsiko du gizartean, ekonomian eta kulturan. "Gure herria berpiztu egingo da", aurreikusi du.

Hori horrela, Gipuzkoako ahaldun nagusiak esan du Euskadi "trantsizioan" dagoela, "indarkeriaren legitimizazioaren oxigenoa" amaitzeko zorian dagoela, eta hori dela terrorismoa amaitzeko "benetako" urratsa.