Politika

Frantziako Polizia Nazionaleko Jean Serge Nerin brigada da orain arte ETA-ren azken biktima. 2010ean hildako pertsona bakarra da Nerin polizia. Auto kontzesionario batean lapurreta egitera joan zen talde batekin izandako tiroketan hilik suertatu zen polizia pasa den martxoaren 16an, Parisetik gertu.

2009an hiru lagun hil zituen erakundea: Eduardo Puelles Garcia Espainiako Poliziko inspektorea ekainak 19an hil zen, auto azpian ipinitako bonba batek eztanda egin ondoren. Uztailean, Carlos Saez de Tejada eta Diego Salva Lezaun Guardia Zibilak hil zituen Calvian (Balear ugartetan) euren patruilan jarritako bonbaren eztandaren ondorioz.

2008an lau izan ziren ETAk hildakoak: Isaías Carrasco, Arrasateko zinegotzi sozialista; Legutioko kuartel etxearen kontrako atentatuan hil zen Juan Manuel Piñuel Guardia Zibla; Luis Conde de la Cruz espainiar armadako brigada, Santoñako kuartelaren kontra egindako atentatuan; eta Inaxio Uria Mendizabal enpresari azpeitiarra, lagunekin kartetan jokatzera zihoala tiroz hil zuten abenduan.

Azken su etena amaitu eta sei hilabetera, ETAren talde batek Raul Centeno eta Fernando Trapero Guardia Zibilak erahil zituen Capbretonen (Frantzia). Hori baino lehen, eta su-etena oraindik ere amaitu zela ofizialki iragarri baino lehen, Barajaseko aireportuko T-4 aparkalekuan jarritako lehergailuaren eztandak Carlos Alonso Palate eta Diego Armando Estacio herritar ekuatoriarrak hil zituen.