Politika

Sortu legeztatzea eskatu du Brian Currin Hegoafrikako abokatua buru duen Nazioarteko Harreman Taldeak, Euskadira egin duen bisitan. ETAren jardueraren amaieraren ondoren, legebiltzar berri batek ''elkarrizketa erabakitzaile'' baten alde lan egitea proposatu du Currinen taldeak.

Egungo Legebiltzarrean sektore politiko guztiak ordezkatuta ez daudela kontuan izanda, orain martxan jarri litezkeen kontaktuek zilegitasunik izango ez luketela uste dute, ohar batean azaldu duenez. Hori dela-eta, Sortu ''ahalik eta arinen'' legeztatzea eta datozen hauteskundeetara aurkezteko aukera izatea eskatu du Currinen taldeak. ''Orduan, gatazkari heltzeko elkarrizketa erabakitzaile bat jarri ahal izango da martxan'', esan dute ohar horretan.

Ordura arte, elkarrizketa hori prestatzeko lanak jorratzeko deialdia egin die alderdiei.

Joan den asteazkenean iritsi zen Nazioarteko Harreman Taldea Bilbora, hainbat agenterekin elkartu eta etorkizunean alderdiek bakea eta normalizazioa jorratzeko bilera bat antolatzeko. Ostiral honetan bukatu da bisita.

Alderdi guztien ordezkariekin bildu nahi zuten, Euskadiko PPko kideekin izan ezik, Antonio Basagoitiren esanetan Currinen taldeak ez baitu ''zeresanik".

Batasuna ohiak Nazioarteko Harreman Taldearen lana eskertu du, eta ezker abertzalearen legalizazioa eskatu du.

Ezker abertzaleak agiri batean jakinarazi duenez, Brian Currinek gidatzen duen Nazioarteko Harreman Taldeak Sorturen defentsan egindako lana eskertu du.

Alderdi bien arteko elkarrizketa beharrezkoa dela azpimarratu du ezker abertzaleak.