Politika

Patxi Lopez lehendakariak bakearen eta elkarbizitzaren eraikuntzan aurrera egiteko helburuarekin "proposamenak laster" aurkeztuko dituela iragarri du.

Lehendakariak Eusko Legebiltzarreko kontrolerako saioan egin du iragarpen hori, Aintzane Ezenarro Aralarko legebiltzarkideak bakean eta elkarbizitzan aurrera egiteko zein ekimen jarriko dituen martxan galdetu eta gero.

ETAk urriaren 20an indarkeriaren amaiera iragarri zuenetik Patxi Lopezek izandako "lidergo falta" kritikatu du Ezenarrok. Aralarreko legebiltzarkidearen ustez, lehendakariaren egitekoa ez da Madrilera joan eta Rajoyri espetxe politika malguago bat eskatzea, euskal gizarteari egitea dagozkion gauza asko daudelako airean eta, hain zuzen, "berehala egin beharrekoak" direla azpimarratu du.

Lehendakariaren iritziz, ETAren indarkeriaren amaierak argi erakusten du legealdia ez dela "alferrikakoa" izan, "guztiz kontrakoa baizik", eta irmotasun demokratikoa erakutsi duten politikak izan dira, horren esanetan, ETAren "totalitarismoari" aurre egitea lortu dutenak.

Patxi Lopezek iralean egindako politika orokorreko osoko bilkuran aurkeztutako Euskadirako elkarkidetza proposamenaren balioa berretsi du gaur.

Elkarkidetza lortzeko gertatutakoaz kontaketa bat egin behar dela azpimarratu du Patxi Lopezek; kontaketa horrek "balio demokratioez bete behar du gizartea, eta horretan, hiltzaileak hiltzailea izan behar du eta biktimak, berriz, biktima". Kontaketa horretan, iraganean indarkeria lagundu duten alderdiek "beren erantzukizuna eta akatsak" onartu behar dituzte, "gizarteak etorkizunean oinarri etiko eta moralak izateko", esan du.

Halaber, espetxe politika "malguago" bat ezartzea eskatu du "horrek onartzen duen eskuzabaltasunarekin" eta legeak presoen gerturatzea, birgizarteratzea eta gaixotasun larria dutenei hirugarren gradua ematea jasotzen duela gogoratu du.

"Eta inork ez luke ikusi behar hau ahuldade gisa Zuzenbide Estatuaren sendotasun gisa baizik, mendekuaren aurrean zigortuaren birgizarteratze soziala helburu nagusia duena", azaldu du.

Ezenarrok lehendakariaren ekimen gehiago bota ditu faltan eta akordio politiko bat bultzatzeko eskatu dio aldaketa horiek bideratu eta gizarteari ere bakearen kultura eraikitzeko oinarria izaten laguntzeko.

Aralarren kritiken aurrean, Patxi Lopezek "diskrezioarekin" lan egitea eta denborak errespetatzea eskatu du, "laster aurrera egiteko aurrerapausoak egingo dira eta publikoak izango dira, baina politikan oso zuhurra izan behar da denborekin eta eszenatokiekin", ohartarazi du.

Hala, "Jaurlaritza honek, ETAren desagerpenaren lidergoa duenak, beharrezkoa den zuhurtziaz egingo du guztia", "atzer bueltarik gabeko" pausoak eman daitezen.

Estatutu esparru berria

Bestalde, Lopez "ziur" agertu da hurrengo legegintzaldian hizpide hartu ahal izando dutela Estatuto esparruaren balizko erreforma bat: "2011 terrorismoaren amaneraren urtea izan zen, eta 2012 enpleguaren aldeko esfortzuen urtea izan behar da".

Lehendakariak Mikel Basabe Aralarreko legebiltzarkideak egindako galdera bati erantzunda egin ditu adierazpenok. Hain zuzen ere, Jesus Eguiguren PSE-EEko presidenteak proposatutako "euskal Konstituzioa"ri buruz galdetu dio.

Hori horrela, Lopezek esan du Estatutua ez dela "guztiz" inoren gustoko, baina "akordio inperfektuak" nahiago dituela, "zatiketa eta frustrazioa sortzen duten amets gauzaezinak" baino.

Lopezek esan du ez diela beldurri eztabaidei, baina edozein "jarrera berri"k 1979ko Estatutuak lortutako babes minimoa izan beharko duela gaineratu du.