Politika

Hauteskundeetan bozkatu nahi baina igande horretan hauteslekuetara joan ezin diren pertsona guztiek oraindik aukera daukate posta bidez euren bozka emateko gaur baita esakera egiteko azken eguna.

Posta bidezko bozka egiteko lehen urratsa Estatuko Posta Bulegoetan eskaera orria betetzea da.

Posta bidezko botoak emateko epea urtarrilaren 6an hasi zen eta gaur amaitzen da Eusko Jaurlaritzako Barne saileko Hauteskunde Prozesu eta Dokumentazio Zuzendaritzak argitaratu duen hauteskunde-egutegiak zehazten duen erara.

Posta bidezko botoa emateko aukera dute: martxoaren 1ean botoa eman behar duten lekuan egongo ez diren EAEko biztanleak eta gaixotasun edo ezintasun fisiko batengatik bozkatzera joan ezin direnak.

Gaixotasun edo ezintasun fisikoen kasuan (medikuaren ziurtagiri ofiziala behar da) eskaera beteta eta sinatuta dagoenean, Posta Bulego batera eraman beharko da eta bertan funtzionarioak hauteslearen NANa eskatu eta sinadura benetakoa dela frogatuko du.

Horren ostean, Hauteskunde Erroldako Bulegoak otsailaren 22an baino lehenago hautesleari posta bidez hurrengo dokumentazioa bidaliko dio:

- Hauteskunde Erroldako izen emate ziurtagiria.
- Botoa eman behar duen Hauteskunde Mahaiko Presidentearen izenean gutunazala.
- “Eusko Legebiltzarrerako Hauteskundeak 2009 Elecciones al Parlamento Vasco" idazpurua
duen gutunazala jasoko dute boto-papera bertan sartzeko.
- Alderdi bakoitzaren boto-paper bana.
- Argibide orri bat (bertan egongo dira beharrezko instrukzioak).

Dokumentazio guzti hau prest dagoenean, Hauteskunde Mahaiko Presidentearen izanean dagoen gutunazalari Hauteskunde Erroldaren ziurtagiria jarri, hautatutako boto-papera duen gutunazala sartu behar da.

Honek ez du frankeorik behar baina zertifikatutako dohaineko posta bidez bidali behar da.

Gutunazala Postako bulegoetan uzteko azken eguna otsailaren 26a izango da.

Atzerrian bizi direnen bozka

EAEko edozein herritan jaio, baina atzerrian bizi direnek (Atzerrian bizi direnen Hauteskunde Erroldan izena emanda dutenak) posta bidezko botoa emateko eskubidea daukate.

Horretarako, Hauteskunde Erroldak otsailaren 13tik aurrera bidaliko die atzerrian bizi diren euskaldunei posta bidezko botoa emateko beharrezko dokumentazioa (D3M eta Askatasunaren zerrenden inpugnazioek zehaztu dute data hau).