Politika

EAJk eskuratuko ditu eserleku gehien Noticias taldeko inkestaren arabera. Baina PSEk eta PPk botoak batzen badituzte gehiengo absolutuaren atarian geldituko dira, ETBk jakitera eman duenez.

Hauteskunde-kanpainako azkeneko asteburu honetan inkestak nonahi izango ditugu. Gaur Deia eta Diario de Noticias taldeko egunkariek atera dute beraiena, eta horien arabera, PSEk, PPk eta UPyDk botoak gehituko balituzte gehiengo absolutua lortuko lukete.

Martxoaren 1ean, hala ere, babes gehien lortuko lukeen alderdia berriz ere Eusko Alderdi Jeltzalea izango litzateke. 28 edo 29 eserleku ematen dizkio galdeketak, duela lau urte EArekin koalizioan lortu zituen beste.

Alderdi Sozialistak 24 edo 25 lortuko lituzke, 2005ean lortutakoak baino sei edo zazpi gehiago. Babesa galduko lukeena, Alderdi Popularra izango litzateke, izan ere, 15 ordezkari izatetik 11 edo 12 lortzera pasako litzateke.

Eusko Alkartasunak ere indarra galduko du, inkestaren arabera. Bat eta hiru eserleku bitartean ematen dizkio galdeketak. EAJrekin koalizioan lortu zituenen erdiak baino gutxiago. Ezker Batuak, ostera, bere hiru ordezkariak mantenduko omen ditu.

Aralar, ezustekoa

Ezustekoa Aralarrek emango du, Noticias taldeko inkestak lau edo bost eserleku ematen baitizkio. Azkeneko lau urteetan ordezkari bakarra izan du Legebiltzarrean.

Gasteizen estreinatuko dena UPyD alderdia da, baina eserleku bakarrarekin. Gainera, 115.000 lagunek baliogabeko botoaren alde egingo dutela esan du inkestak eta 240.000 bat oraindik ez dutela erabaki zer bozkatuko duten. Hori bai, parte-hartzea oso altua izango omen da, % 73koa, 2005ean baino bost puntu gehiago.