Politika

Gernikako Akordioko kideek Iosu Uribetxebarriaren eta gaixo dauden gainontzeko ETAko 13 presoen askatasuna exijitu dute Bilbon, Herrirako zenbait kiderekin batera, egindako elkarretaratzean.

Euskadi plazan egindako ekitaldia, ostiralean Santiago Pedraz epaileak larunbaterako deituta zegoen manifestazioa debekatu ostean egin dute. Manifestazioa Herrirak deitu zuen eta 12:30ean egitekoa ziren. Epaileak debekatu egin zuen, manifestazioaren helburua ETAko kide bat eta borroka armatua goratzea zelako.

Elkarretaratzearen hasieran, Iosu Murgiak eta Sonia Gonzalezek hitz batzuk esan dituzte Gernikako Akordioko kideen izenean. Gobernuari esan diote espetxe-politikarekin amaitzeko, ETAko presoen kontrako "mendeku-tresna" gisa erabiltzen dutelako.

Uribetxebarria

Uribetxebarriaren egoerari ere erreferentzia egin diote. Arrasateko presoak minbizia dauka eta Donostia Ospitalean dago. Uribetxebarriak 11 egun daramatza gose-greban.

Gauzak horrela, ETAko presoaren berehalako askatasuna eskatu du, Espetxeetako Agintaritzak hirugarren gradua ematea erabaki ondoren.

AVT-ak debekua eskatu zuen

Terrorismoaren Biktimen Elkarteak (AVT) elkarretaratzea debekatzea eskatu zuen.

Epaitegian aurkeztutako idatzian, elkarretaratzearen eta debekatutako manifestazioaren artean antzekotasun ugari zeudela salatzen zuten.