Politika

Gemma Zabaleta Areta (Donostia, 1956) sozialistak politika utzi du, ibilbide politikoa zerbitzu sozialei lotuta egin eta gero.

Zabaleta Enplegu eta Gizarte Gaietako sailburua izan da Patxi Lopez lehendakariaren Eusko Jaurlaritzan (2009-2012), baina aldez aurretik Gizarte Zerbitzuetako foru diputatua izan zen Gipuzkoan.

Sailburu gisa, Lanbide EAEko Enplegu Zerbitzua jarri du martxan.

Buruzagi sozialista legebiltzarkidea izan zen 1998tik 2009ra, eta 2002an PSE-EEko idazkari nagusi izateko hautagaitza aurkeztu zuen.

1993an senataria izan zen, baina udaletan ere aritu da. Hori horrela, zinegotzi izan zen Andoainen, eta PSE-EEren bozeramailea Urretxun.

Filologia Hispaniko katedraduna da, eta Eusko Jaurlaritzako Pedagogi Berrikuntzarako zuzendaria izan zen.

Zabaleta PSE-EEren sektore euskaltzalearen ordezkarietako bat izan da, eta kritika asko jaso ditu Ahotsak emakume plataformako kidea izateagatik (ezker abertzaleko emakumeak ere badaudelako bertan), eta euskal gatazka negoziazioaren bidez konpontzen saiatzearen aldekoa baitzen.