Politika

EAEko hauteskundeetarako lehendakarigaiak, hau da, Juan Jose Ibarretxe (EAJ), Patxi Lopez (PSE), Antonio Basagoiti (PP), Unai Ziarreta (EA), Javier Madrazo (EB) eta Aintzane Ezenarro (Aralar), aurrez aurre izan dira bart kanpainan aurrenekoz ETB-2k, Radio Euskadik eta eitb.com-ek igorritako eztabaidan.

Gizaker konpainiak egindako inkesta baten arabera, ikus-entzuleen %52,7k uste dute Juan Jose Ibarretxe EAJko hautagaiak irabazi duela. %6,7k uste dute garailea Lopez izan dela, %6,3k Ezenarro, %6k Basagoiti, %3,7k Ziarreta eta %1,7k Madrazo.

Oro har, ikus-entzuleek 6,67ko nota jarri diote eztabaidari, eta gehien interesatu zaizkien gaiak ekonomia, krisiari aurre egiteko neurriak eta etxebizitza eta azpiegiturak izan dira.

Hautagaien balorazioei dagokienez, inkestan parte hartu duten pertsonek 7.43 eman diote Ibarretxeri, 5.69 Ezenarrori, 5.35 Basagoitiri, 5.05 Lopezi, 4.62 Madrazori eta 4.34 Ziarretari.

Halaber, %23,4k ziurtatu dute eztabaidak baliagarri izan dutela euren boto-asmoa sendotzeko.

Zoriz hautatutako eta aldez aurretik debatea ikusiko zutela esan zuten 407 pertsona elkarrizketatuz egin dute inkesta.