Politika

eitb.com-ek edozein igandetan izaten dituen orri ikusiak laukoiztu egin zituen martxoaren 1eko hauteskunde gauean. Era berean, bisiten eta erabiltzaile bakarren kopurua bikoiztu egin zuen, Nielsen netratings enpresak (Espainiako Estatuko webgune nagusien audientziak neurtzen ditu) emandako datuen arabera.

Orri ikusien kopurua 654.941ekoa izan zen, erdiak baino gehiago momentu oro berritzen ari ziren eta herriz herri kontsulta zitezkeen hauteskundeen emaitzak jakiteko. Bisitak 51.005 izan ziren eta erabiltzaile bakarrak 40.428.

ETB izan zen nagusi

Ikaragarriak izan ziren Euskal Telebistako saio bereziek lortu zituzten audientziak. ETB-2ko hauteskunde-saioak %28,9ko pantaila-kuota lortu zuen batez beste eta nagusi izan zen hauteskunde-gauan, Sofres A.M.ren neurketetan oinarrituta.

Gainerako telebista kateek honako pantaila-kuota lortu zuten 20:44etik 00:20ra bitartean: Antena 3k %16’8, Telecincok %14,1 eta TVEk %9,9.

Milioi bat pertsonak baino gehiagok ikusi zuen momenturen batean ETB-2ren saio berezia. Batez beste, berriz, 251.000 ikus-entzulek ikusi zuten.

ETB-1i dagokionez, 400.000 lagun inguruk ikusi zuten saio berezia arratsaldeko zortzietatik gauerdira bitartean.