Teknologia

EITBren Bilboko egoitza digitalak nonick nazioarteko batzarra hartuko du apirilaren 24tik 25era (hurrengo ostiral eta larunbata). Horrenbestez, hurrengo egunak azkenak izango dira nonickconference webgunean izena emateko.

Nonick ekimenak erreferente izan nahi du Europan, Interneten eta networking-en munduan. Euskal komunikazio taldea eta Spri dira antolatzaileak, Alianzo enpresa lagun.

Batzarraren programak networking ideia du oinarri, baina batik bat bideoa, Internet eta telebista izango ditu aurten abiapuntu. Gai horien harira hainbat ekitaldi egingo dituzte, hala nola hiru eztabaida, Startup 2.0 lehiaketa, Euro Blog Awards sarien banaketa, Developers Garage bat, Kiss (Keep It Sinple, Stupid) Night bat eta ikastaro praktikoak.

Nonick nazioartekoa denez, ekitaldi guztiak ingelesez egingo dituzte. Eta izenak berak argi uzten duenez, giza harreman zuzenak sustatzea du helburu, "nick edo ezizenik gabe", negozioak, ideiak, aukerak eta inspirazioa aurkitzeko xedez.

Ostiralean, apirilak 24, "Engaging with creative content producers" bideo blogarien arteko eztabaidak emango dio hasiera batzarrari. Gabe Mac izango da moderatzailea. Hurrengo eztabaida, "Next on video on the net" izenekoa, arratsaldean egingo dute. Besteak beste, Youtube eta Dailymotion plataformetako eta Cisco Systems enpresako ordezkariek hartuko dute parte.

Larunbat eguerdian hirugarren eta azken eztabaida izango da: "How to make a successful and profitable videowebsite". Kutsu praktikoa izango du eta arrakasta izan duten bi webgune jarriko dituzte adibide bezala. Webguneen bisitak neurtzen eta publizitatearen munduan aditu diren hainbat pertsonak hartuko dute parte.

Bestalde, Developers Garage sekzioan, aplikazioak garatzen dauden eta hainbat plataformatan lanean dauden zenbait pertsonak euren azken proiektuak aurkeztuko dituzte. Larunbat goizeko tailerrak irekiak dira, parte hartzaileek, nahi badute, nahi duten gai baten inguruko aurkezpena egin dezaten.

Halaber, aurten Startup 2.0 ekimenaren beste edizio bat egingo dute. Nonickek lehiaketaren finala hartuko du, eta horretan, sortu berri diren Europako hainbat enpresa lehiatu egingo dira. Lehiaketa Europako garrantzitsuena bihurtu da aurreko bi edizioen ondoren.

Azkenik, Euroblog Awards sariak ere izango dira. 12 adituk osatutako epai-mahaiak blog onena aukeratuko du. Guztira, Europako 10 hizkuntza hedatuenen ordezkariak izango dira bertan, baita euskararen ordezkari bat eta beste hizkuntzetarako ordezkari bat ere.