Teknologia

Youtubek Reporters’ Center kanal berria sortu du, herritarren kazetaritzan parte hartzen duen edonori bideo informatiboak nola grabatu erakusteko eta aholakuak emateko.

Kanal berri horren bitartez, kaleko jendeak argitaratzen dituen bideoak hobetzeko aukera izango du, kazetari profesionalek egiten dituzten bideoen antza handiena izan dezaten.

Youtuberen kanal berrian agertzen denez, honakoa da Reporters'' Centerren lelo nagusia: "Grabatu al duzu inoiz hondamendi natural bat edo delitu bat sakelako telefonoko kamerarekin? Grabatu al duzu inoiz mitin politiko bat edo protesta manifestazio bat eta parte hartzaileetako bat elkarrizketatu? Argitaratu al duzu zure inguruko gairen bati buruzko historiaren bat? Horietakoren bat egin baduzu edo egiteko asmoa baduzu, Youtuberen herritarren kazetaritza komunitateko kidea zara, eta hau da zuri zuzendutako kanala".

Reporters'' Centerren kazetaritza lana egiten duten kaleko jendearentzat interesgarriak diren azalpen bideoak jarri dituzte. Oraingoz, baina, ingelesez bakarrik dago webgunea.

Bob Woodward edo Arianna huffington bezalako kazetari handiek, Reuters edo Associated Press bezalako albiste agentziek, NewsWeek, Time edo Washington Post hedabideek, parte hartzen dute Reporters'' Centerren eta bideoak grabatu dituzte kazetaritzaren jarduerarekin lotura duten aholkuak edo laguntzazko azalpenak emateko.