Teknologia

Euskaltelen Internet zerbitzua dutenek Microsoften Windows Live teknologian oinarritutako posta zerbitzu berria izango dute laster. Teknologia hori hartuko duen Europako lehen operadorea izango da Euskaltel eta mundu osoko bosgarrena.

Microsoftek eta Euskaltelek hitzarmen bat sinatu eta sistema berri bat kaleratuko dute; gaur Bilbon aurkeztu dute. Hitzarmenaren arabera, Euskal Herriko operadorearen 400.000 bezerok Messenger, argazki galeriak eta Facebook eta Twitter bezalako gizarte sareetarako sarrera bateratua izango dute eskuragarri beren posta kontutik.

Alberto Garcia Erauzkin konpainiako zuzendari nagusiak azaldu duenez, posta elektroniko zerbitzu berriak 5 gigabyteko edukiera izango du; baina, beharren arabera, handiagotu ahal izango da.

Plataformak erabiltzailearen argazki eta bideoak kudeatzeko eta 25 gigabyteko zerbitzari batean biltzeko aukera eskainiko du.

Garcia Erauzkin azaldu duenez, Windows Live plataformara mugikorretik sartzeko aukera izango dute erabiltzaileek. Zerbitzua hil honen 22an jarriko dute martxan.

.

&' || 'nbsp;