Teknologia

Googleren argazki bidezko kale-izendegi berriak, Street View -ek, 300 kexa jaso ditu astebetean Suitzan. Argazkietan euren aurpegiak lausotzeko edo, beste barik, irudi horiek Saretik kentzeko eskatu dute herritarrek.

Aurretik ere kritikak jaso ditu Googlek beste hainbat tokitan, pertsonen intimitaterako eskubidea urratu dutelakoan, zerbitzu horrek argitasun handiz aireratu dituelako pertsonen aurpegiak, autoak eta etxeak.

Suitzaren kasuan, abuztuaren 18an kaleratu zutenetik, 300 pertsona, enpresa eta administrazio publiko kexatu dira Google zerbitzuaren aurrean eta Hanspeter Thür datuak babesteko arduradun federalaren aurrean.

Hori dela eta, Thürrek Googleren zerbitzua Internetetik berehala kentzeko eskatu du "bizitza pribatua babesteko neurriak errespetatzen ez dituelako".

Argazkietan aurpegiak eta autoen matrikulak ilunduko zituela iragarri arren, "irudiak lausotzen dituen tresna oraindik ez dabil", Googleren arabera.